Foto: Senat
Álisher Satybaldıev Memleket basshysynyń Joldaýda kótergen 9 máselesi keıingi 5 jylda qolǵa alynǵan reformalardyń jalǵasy ekenin atap ótti.
«Búgin jyl saıynǵy dástúrge sáıkes QR Parlamenti palatalarynyń birlesken otyrysy ótti. Memleket basshysynyń qatysýymen ótken jıynda segizinshi saılanǵan Parlamenttiń úshinshi sessııasy ashyldy. Sonymen qatar Prezıdent Qazaqstan halqyna dástúrli Joldaýyn arnady.
Joldaýda nazarǵa alynǵan máseleler men basymdyqtar el ómiriniń barlyq salasyna tıesili ekendigimen este qaldy. Memleket basshysy Joldaýda atap ótken negizgi 9 strategııalyq baǵyttar mynalar:
- Aqsha-nesıe saıasaty men fıskaldy saıasattyń arasyndaǵy úılesimsizdikti joıý qajet.
- Investısııalyq ahýaldy jáne bıznes júrgizýge qajetti jaǵdaıdy jaqsartý jolynda úzdiksiz jumys isteý mańyzdy.
- Elimizdiń ónerkásip áleýetin tolyq paıdalaný úshin jan-jaqty sharalar qabyldaý qajet.
- Infraqurylymǵa qatysty ózekti máselelerdi sheshý qajet.
- Elimizdiń kadrlyq áleýetin birtindep arttyrý óte mańyzdy.
- Ult saýlyǵyn nyǵaıtý úshin keshendi sharalardy qolǵa alyp, halyqty áleýmettik qoldaý júıesin jańǵyrtý kerek.
- Ekologııalyq ahýaldy jaqsartý – aldymyzda turǵan negizgi mindettiń biri.
- Memlekettik basqarý isiniń tıimdiligin barynsha arttyrý kerek.
- Qoǵamda zań men tártip ıdeologııasyn tereń ornyqtyrý qajet.
Bul baǵyttar boıynsha atqarylýy kózdelgen jumystardyń deni sońǵy bes jylda elimizde qolǵa alynǵan aýqymdy reformalyq saıasattyń jalǵasy bolyp sanalady. Atqarylǵan júıeli jumystyń nátıjesinde tıisti alǵysharttar jasaý arqyly osy strategııalyq baǵyttardy júzege asyrý múmkindigi týdy deýge bolady», dedi Á.Satybaldıev.
Senator AES salý boıynsha referendým ýaqytynyń belgilenýi de mańyzdy jańalyq ekenine toqtaldy.
«Joldaý barysynda atalǵan tezısterdiń arasynan AES salý boıynsha referendým merziminiń anyqtalǵany eń talqylaýly másele bolary anyq. Dese de, elimizdiń energetıkalyq qaýipsizdigin AES salý arqyly sheshýdiń durys-burysyn el azamattary sońǵy bir jyl boıy qyzý talqylap keldi. Endi sheshim qabyldaý kezeńi týdy. Bul tańdaý arqyly otandastarymyzdyń aýyzbirshiligi aıqyn kórinerine senimdimin.
Memleket basshysynyń osy turǵydan: «Bizdiń uzaq merzimge arnalǵan damý jolymyz – aıqyn. Bıik maqsattarymyz bar. Oǵan jetý úshin, eń aldymen, el birligin saqtaı bilýimiz kerek. Bir-birimizge qoldaý bildirip, qurmet kórsetýimiz qajet» degeni beker emes», dedi Á.Satybaldıev.
