Foto: senate.parlam.kz
Sondaı-aq zań men tártipti qamtamasyz etýge jáne saıası júıeniń tıimdiligin arttyrýǵa arnalǵan mańyzdy mindetter de belgilendi.
Joldaýda bankterdiń ekonomıkaǵa kóbirek qarjy quıýyna jaǵdaı jasaý máselesine basa mán berildi. Qazirgi tańda otandyq bankterdiń tabysy aıtarlyqtaı deńgeıde ekeni belgili. Ony halyqaralyq sarapshylar da atap ótken. Soǵan qaramastan bankterdiń bıznesti qarjylandyrý belsendiligi tómen bolyp otyr. Osyǵan baılanysty Memleket basshysy bul saladaǵy salyq mólsherin ádil belgileý kerektigine nazar aýdaryp, Bankter týraly jańa zań qabyldaýdy tapsyrdy.
Sonymen qatar otandyq bıznestiń ulttyq ekonomıkadaǵy úlesin aıtarlyqtaı ulǵaıtýǵa múmkindik beretin sharalar kesheni qabyldandy. Budan bylaı óndiristi órkendetemiz degen ınvestorlarǵa jáne tereń óńdelgen ónimdi eksportqa shyǵaratyn kásipkerlerge jeńildikter qarastyrylady.
Salyqtyq ákimshilendirý isinde de bıznes qaýymdastyq úshin tıimdi sheshimder qabyldanady. Osyǵan oraı Salyq kodeksin ázirleý prosesi tyńǵylyqty ári baıypty júrgiziledi. Prezıdentimiz osyndaı júıeli qoldaý sharalarynyń arqasynda 2029 jylǵa qaraı orta bıznestiń el ekonomıkasyndaǵy úlesin 15 paıyzǵa jetkizýdi mindet etip júktedi. Qazir bul kórsetkish – 7 paıyz shamasynda.
Memleket basshysy Joldaýda elimizdiń ónerkásip áleýetin tolyq paıdalaný máselesine de aıryqsha toqtaldy. Bul baǵytta avtokólik qurastyrý jáne munaı-gaz-hımııa salasyn odan ári damytý jónindegi naqty jobalarǵa basymdyq beriledi.
Elimizde ınfraqurylym baǵytynda qordalanǵan problemalar da az emes. Bul, ásirese, energetıka jáne kommýnaldyq sharýashylyq úshin óte ózekti. Sondyqtan Prezıdentimiz osy salany jańǵyrtý jónindegi ulttyq jobany jyl sońyna deıin bekitýdi tapsyrdy. Bul qujat azamattardyń turmys sapasyn jaqsartýǵa tikeleı yqpal etetini anyq.
Qasym-Jomart Kemeluly qoǵamda qyzý talqylanǵan atom elektr stansasyn salý máselesine de erekshe mán berdi. AES salýǵa qatysty jalpyulttyq referendým 6 qazanda ótetini belgili boldy. Bul – qoǵamdyq pikirdiń ústemdigin kórsetetin mańyzdy qadam. Osy rette azamattarymyz belsendilik tanytady dep senemiz.
Saıası júıeni reformalaý isi de nazardan tys qalmady. Bul baǵytta sońǵy jyldarda aýqymdy reformalar úzdiksiz júzege asyrylǵany belgili. Sol jumystardyń kelesi kezeńinde aýdan jáne oblystyq mańyzy bar qalalardyń ákimderi tikeleı saılanady.
Sondaı-aq Joldaýda kólik-logıstıka, agroónerkásip, bilim berý, densaýlyq saqtaý, sıfrlyq damý jáne taǵy basqa salalardy jetildirýge qatysty naqty mindetter belgilendi. Qoǵamda zań men tártip ıdeologııasyn tereń ornyqtyrý qajettiligi de naqty belgilendi.
Osy jáne basqa da mindetter men maqsattarǵa qol jetkizý úshin tıisti zańdar qabyldaý qajet. Bul qatarda Prezıdentimiz atap kórsetken bankter, quqyq buzýshylyqtardyń aldyn alý, buqaralyq sportty damytý, áleýmettik saıasat, aktıvterdi qaıtarý týraly zańdar bar.
Munyń bári Parlamentke mańyzdy mindetter júkteıdi. Osyǵan oraı Senat Májilis pen Úkimettegi áriptesterimen jáne sarapshylarmen birge belsendi jumys isteıtin bolady.
Memleket basshysy belgilep bergen basymdyqtardy sapaly ári ýaqtyly júzege asyrý elimizdiń turaqty ekonomıkalyq damýyna jáne Ádiletti Qazaqstannyń tuǵyryn nyǵaıta túsýge tyń serpin beredi dep senemiz.
Máýlen ÁShIMBAEV,
QR Parlamenti Senatynyń tóraǵasy
