Bul elimizdiń bolashaq baǵdaryn qamtyǵan aýqymy keń, mazmuny tereń Joldaý boldy. Jalpy, ár Joldaý – alǵa degen qarqyndy umtylys. Prezıdent laýazymyna kirisken kúnnen bastap Qasym-Jomart Kemeluly aýqymdy strategııalyq reformalardy qolǵa alǵan bolatyn. Búgingi Joldaý – sol reformalardyń zańdy jalǵasy. Osylaısha, Memleket basshysynyń ekonomıka, saıasat pen ıdeologııa salasyn qatar reformalaýǵa baǵyttalǵan strategııalyq baǵdary úzdiksiz iske asyp keledi.
Sondaı-aq bul Joldaý – qoǵamdy tolǵandyryp otyrǵan eń ózekti problemalarǵa naqty jaýap. Depýtattar kúni keshe óńirlerden oraldy. Biz halyqtyń suranysyn, talap-tilegi men muń-muqtajyn, eldegi jaǵdaıdy jaqsy bilemiz. Osy oraıda Prezıdenttiń ustanymdary men bastamalary halyqtyń suranysymen tolyq úndesip tur.
Memleket basshysy Joldaýda el damýy úshin mańyzdy 9 strategııalyq baǵytty aıqyndap berdi. Olardyń qatarynda aqsha-nesıe jáne fıskaldy saıasattyń arasyndaǵy úılesimsizdikti joıý, ınvestısııalyq ahýaldy jáne bıznes júrgizýge qajetti jaǵdaıdy jaqsartý, ónerkásip áleýetin tolyq paıdalaný, ınfraqurylymǵa qatysty ózekti máselelerdi sheshý, kadrlyq áleýetti arttyrý, ult saýlyǵyn nyǵaıtý úshin keshendi sharalardy qolǵa alý, halyqty áleýmettik qoldaý júıesin jańǵyrtý, ekologııalyq ahýaldy jaqsartý, memlekettik basqarý isiniń tıimdiligin arttyrý jáne qoǵamda zań men tártip ıdeologııasyn tereń ornyqtyrý máseleleri bar.
Prezıdent Parlament depýtattary aldyna da atalǵan strategııalyq baǵyttardy zańnamalyq turǵyda qamtamasyz etýde birqatar naqty mindet qoıdy. Shaǵyn jáne orta bıznesti jetkilikti deńgeıde qoldaý, aýyl sharýashylyǵyn qarjylandyrý, bankterdiń ekonomıkaǵa kóbirek qarjy quıýyna jaǵdaı jasaý, salyq saıasatyn qaıta qaraý men bıýdjet tapshylyǵy máselesin sheshýge baǵyttalǵan mańyzdy sharalar aıtyldy. Bankter týraly jańa zań qabyldaý jóninde tapsyrma berip, elimizde memlekettik kásiporyndardy basqarý saıasatyn jetildirýdi zańmen retteýdi júktedi.
Sonymen qatar Prezıdent Ulttyq qor qarajatyn tıimdi paıdalanýda da aldymyzǵa zor mindet qoıdy. Qarajat sheteldik qarjy ınstıtýttaryna emes, el múddesine qyzmet etýi kerek. Osy qadamdardyń barlyǵy ekonomıkanyń ósýine zor serpin bermek. Prezıdent aıtqandaı, áleýmettik teńsizdikti azaıtyp, orta tapty kúsheıte túsedi. Al myqty orta tap – myqty memleketke aınalýdyń kepili.
Memleket basshysy halyqty tolǵandyrǵan eń mańyzdy áleýmettik máselelerdi sheshýge erekshe mán berip otyr. Sonyń ishinde «Jaıly mektep» jobasyna jeke toqtaldy. Prezıdenttiń osy serpindi jobasynyń tolyqqandy iske asýyna depýtattar barynsha atsalyspaq.
Sondaı-aq Joldaýda buqaralyq sportty damytýǵa da erekshe kóńil bólindi. Memleket basshysy osy salany retteıtin zańnamany jańartýdy tapsyrdy. Qazir Májiliste deneshynyqtyrý týraly zań jobasy qaralyp jatyr. Buqaralyq sportty damytý máselesin osy zań aıasynda qarastyramyz.
Jalpy, qazir el ekonomıkasyn bilikti kadrlarmen qamtamasyz etý kúrdeli bolyp tur. Ásirese sý salasy mamandary, qurylysshylar, energetıkter, veterınarlar tapshy. Bolashaqta suranysqa ıe bolatyn kásipter úshin de kadrlar daıarlaý kerek. Osy oraıda Prezıdent eldiń kadrlyq áleýetin birtindep arttyrý boıynsha úlken mindetter qoıdy. 2025 jyldy Jumysshy mamandyqtar jyly dep dóp basyp jarııalady. Bul – qarapaıym jumysshylar úshin úlken motıvasııa.
Qoǵamda AES salý máselesi osy kezge deıin jan-jaqty talqylanyp kele jatqan. Memleket basshysy Joldaýda osy taǵdyrsheshti máselege de arnaıy toqtalyp, 6 qazan kúni AES salý boıynsha jalpyulttyq referendým ótkizý týraly málimdedi. Al túpkilikti sheshimdi halyqtyń ózi qabyldaıdy. Bul – Memleket basshysynyń berik ustanymy. Osy sharalar – «Halyq únine qulaq asatyn Úkimet» tujyrymdamasynyń naqty nátıjesi. Elimizde jańa saıası mádenıet qalyptasyp kele jatqanyn kórsetedi.
Qazir jahandyq geosaıası ahýal kúrdeli. Álemde, Qazaqstanda túbegeıli ózgerister júrip jatyr. Osynaý almaǵaıyp kezeńde memleketimiz damýdyń jańa baǵdaryn aıqyndap, sol jolmen senimdi qadam basyp keledi. Ol – Prezıdent aıtqandaı, Ádiletti, Taza jáne Qaýipsiz Qazaqstan qurý joly. Biz osy alǵan baǵytymyzdan taımaýymyz qajet. Zań men tártip ústemdik quryp, birligi bekem birtutas ultqa aınalýymyz kerek. Buǵan Memleket basshysynyń keshegi Joldaýynda kóterilgen bastamalar men qoıylǵan mindetterdiń oryndalýy naqty múmkindik beretinine senimdimin. Depýtattar bul tapsyrmalardy oryndaýǵa bilek sybana kirisedi.
Erlan QOShANOV,
Májilis tóraǵasy
