Foto: kaz.people.cn
Mınıstrliktiń habarlaýynsha, sıfrlyq sheshim paıdalanýshylarǵa eńbek naryǵyndaǵy ózekti trendterdi zerdeleýge, ártúrli kásipterdiń suranysyn salystyrýǵa jáne ońtaıly bilim berý traektorııasyn tańdaýǵa biregeı múmkindik beredi.
«Platforma 2019 jyldan bastap otandyq eńbek naryǵy týraly derekterdi taldaıdy, bul paıdalanýshylarǵa ózgerister dınamıkasyn baǵalaýǵa jáne bolashaq úrdisterdi boljaýǵa múmkindik beredi. Jobanyń bir ereksheligi – jumys izdeýdiń barlyq negizgi platformalaryn taldaý. Bul paıdalanýshylarǵa eń kóp suranysqa ıe kásipterdi baǵdarlaýǵa jáne eń jaqsy eńbek jaǵdaılary bar aımaqtardy tańdaýǵa múmkindik beredi. Sonymen birge platforma joǵary oqý oryndary, mamandyqtar jáne memlekettik granttar alý múmkindikteri týraly tolyq málimet beredi», delingen habarlamada.
Aıta keteıik, jobany bastaý úshin joǵary bilim alýdy talap etetin 300-den astam keń taralǵan mamandyqtarǵa tereń taldaý júrgizilgen. Kelesi kezeńderde osyndaı jumys negizgi tehnıkalyq jáne jumysshy mamandyqtar boıynsha, sondaı-aq qosymsha bilim berý salasynda júrgizilmek. Sondaı-aq 2024 jyldyń sońyna qaraı mamandyqtar týraly derekterdi dálirek boljaý jáne taldaý úshin mashınalyq oqytý modelderin engizý josparlanǵan.
Sonymen qatar portalda kásipter, bilim berý baǵdarlamalary men jumys oryndary týraly aqparatty saqtaýǵa arnalǵan málimetter bazasy, sondaı-aq paıdalanýshylardyń daǵdylaryn baǵalaý jáne jaqsartý quraldary sekildi jańa fýnksıonal paıda bolady.
- «Mansap kompasy» jobasynyń aýdıtorııasy óz mansabyn josparlaýǵa jáne kásibı damýǵa múddeli adamdardyń ártúrli sanattaryn qamtıdy. Birinshi kezeńde – mektep túlekteri men stýdentter. Olar úshin platforma suranysqa ıe mamandyqtar, joǵary oqý oryndaryna túsýshilerge qoıylatyn talaptar jáne granttar alý múmkindikteri týraly aqparat kózi bola alady, sondaı-aq tańdalǵan mamandyqtyń bolashaǵyn baǵalaý, taǵylymdamadan ótý jáne bolashaq jumysty izdeý úshin biregeı aqparat beredi, – dep atap ótti ERDO vıse-prezıdenti Shalqar Baıqulaqov.
Portal mamandyǵyn ózgertkisi keletin adamdar úshin de paıdaly bolmaqshy. Demek, óz daǵdylaryn taldaýǵa, jańa kásibı maqsattardy anyqtaýǵa jáne tıisti bilim berý baǵdarlamalaryn tabýǵa múmkindik týyp otyr.
