Naýqas týabitti dısplazııa, jambas býynynyń kemistigi, jambastyń joǵarǵy jaǵynyń shyǵyp ketýi syndy dıagnozdarmen ómir súrip kelgen. Osy detttiń saldarynan bir aıaǵy ekinshisinen 10 sm qysqaryp, ómir boıy aıaǵyn syltyp basatynyn aıtady. Oǵan qosa, naýqastyń sońǵy kezde tize býyndary, jilinshigi aýyryp, aıaqtarynyń qozǵalýy qıyndaǵan. Ýaqyt óte kele jambasy qısaıyp bel aýrýyna dýshar bolypty.
Jetinshi aýrýhananyń travmatolog-ortoped mamandary konsılıým uıymdastyryp, naýqasqa ota jasaý týraly sheshim qabyldady.
«Biz súıek qalybyn retteýge arnalǵan osteotomııa ádisin qoldandyq. Pasıenttiń aıaǵyn sozyp uzartyp, shetelde shyǵarylǵan zamanaýı endoprotez ornatyldy. 28 jyl ómirin osy dertpen alysýǵa arnaǵan naýqas operasııadan keıin ekinshi kúni-aq aıaqqa turdy, arnaıy qurylǵynyń kómegimen júrip-tura bastady. О́mirge qulshynysy artyp, kóńil-kúıi kóterilgen pasıentterdi kórý biz úshin de úlken baqyt», deıdi aýrýhananyń Polıjaraqat bólimshesi meńgerýshisi Ramazan Askerov.
Dárigerdiń aıtýynsha, bul óte kúrdeli ota. Sebebi operasııa barysynda býyn men júıke júıesiniń zaqymdaný qaýpi týyndaıdy. Onyń ústine, aıaqty sozyp uzartqan kezde quıymshaqtaǵy nerv qysylyp, býyndar úzilip ketý qaýpi joǵary bolatyn.
«Jalpy, asqan biliktilik pen dáldikti, eptilikti talap etetin mundaı hırýrgııalyq operasııalar óte sırek jasalady», deıdi maman.
Bas-aıaǵy 5 saǵatqa sozylǵan biregeı operasııa mindetti áleýmettik medısınalyq saqtandyrý esebinen jasaldy.
