№97 mektep-gımnazııada ashylǵan osyndaı jańa sıpattaǵy ınklıýzııany qoldaý kabınetiniń birin «Samuryq-Qazyna» qorynyń basqarma tóraǵasy Nurlan Jaqypov pen Astana ákiminiń orynbasary Eset Baıken aralap kórdi. Jańa sıpattaǵy tıisti synyptar №22 mektep-gımnazııada, №36 orta mektepte, K.Myńbaev atyndaǵy №59 mektep-lıseıde, Á.Bókeıhan atyndaǵy №76 mektep-lıseıde jabdyqtaldy. Igilikti is «Charity Samruk Marathon» qaıyrymdylyq marafony kezinde jınalǵan 126,7 mıllıon teńgege atqarylǵanyn atap ótken jón. Bul qarajatqa mektepterde jóndeý jumystary júrgizilip, qural-jabdyqtar, jıhaz ben oqý-ádistemelik keshenderi satyp alyndy, mamandar daıarlandy.
«Samuryq-Qazyna» AQ korporatıvtik áleýmettik jaýapkershilik aıasynda erekshe qajettilikteri bar adamdardy keshendi túrde qoldap keledi. El óńirlerinde 42 ońaltý ortalyǵyn, 10 sport keshenin ashtyq. Beıimdelgen sport seksııalaryna 1000-nan astam bala qatysady. Múgedektigi bar jastardy sıfrlyq kásipterge oqytýdy bastadyq. Osylaısha, adamdarǵa týǵanynan bastap kómek kórsetip, olardyń qoǵamda áleýmettenýine barlyq jaǵynan yqpal etemiz», dedi Nurlan Jaqypov.
Inklıýzııany qoldaý kabınetiniń úlgisin Qor ınklıýzııa salasyndaǵy sarapshylarmen birlesip ázirledi. Synyptar eki bólek keńistikten turady: psıholog, defektolog, logoped jáne qysh buıymdaryn jasaý kabınetine open space túrindegi keń bólmeler, sonymen qatar emdik dene shynyqtyrý kabıneti (fızıkalyq terapııa). Dárishanalar aýmaǵy keminde 60 sharshy metrdi quraıdy. Bul sáıkesinshe balalarǵa yńǵaıly da jaıly jaǵdaıda sabaq ótkizýge múmkindik beredi.
«Sizder keremet jumys jasadyńyzdar. Sizderdiń arqalaryńyzda erekshe balalar qarapaıym balalarmen birge oqýǵa múmkindik aldy. Qazir meniń ulym beıimdelý kezeńinen ótip jatyr. Muǵalimniń nusqaýlaryn oryndaýdy úırenedi, ortaǵa qosylady. Aýtızmi bar balalar úshin áleýmettený óte mańyzdy», dep rızashylyǵyn jetkizdi mektep oqýshysynyń anasy Marııa Aıdarhanova.
Oqytýshylar men mamandar oqýdan ótip, olarǵa jyl boıyna ádistemelik qoldaý kórsetiledi. Inklıýzııany qoldaý kabınetterin qurý jobasyn «Samuryq-Qazyna» kompanııalar toby atynan «Samruk-Kazyna Trust» qory júzege asyrdy.
