«О́z áýletimnen shyqqan tuńǵysh sadaqshymyn»
Ispanııadan kelgen 68 jastaǵy Marısol Karrıon Djımenestiń aıtýynsha, kúıeýi Felıks Gallego Gýerrero ekeýi osy týrnırge qatysyp jatqan sadaqshylardyń ishindegi eń jasy úlkenderi. О́ziniń sadaq atýmen shuǵyldanyp júrgenine 10 jyldan asypty.
«Ispanııada «Dástúrli sadaq atý qoǵamy» dep atalatyn uıym bar. Onyń jumys istep kele jatqanyna 12 jyldaı boldy. Biz zaıybym ekeýmiz osy qoǵamnyń múshelerimiz. Dúnıejúzilik kóshpeliler oıyndaryna birinshi ret qatysyp jatyrmyz», deıdi ol.
Erli-zaıypty Felıks aǵaı men Marısol apaı buǵan deıin Ispanııadan bólek, Portýgalııa, Fransııa, taǵy birqatar elde ótken jarystarǵa qatysyp, júldeli oryndarǵa ıe bolǵan. Ásirese Portýgalııadaǵy halyqaralyq týrnırde alǵan 2-orynyn erekshe maqtan tutady. Al qazaq eline olar tuńǵysh kelip otyr.
«Maǵan bul oıyndardyń uıymdastyrylýy óte unady. Kóp elde boldyq. Sondyqtan salystyra alamyz. Dúnıejúzilik kóshpeliler oıyndary Olımpııa oıyndary sekildi joǵary deńgeıde ótip jatyr. О́z atymnan bizge qajet kezde qol ushyn sozyp, baǵyt-baǵdar berip, kómektesip júrgen volonter jastarǵa alǵys aıtqym keledi», dedi Marısol Djımenes.
Erli-zaıyptylar bul oıyndarda ázirge júldeli orynǵa ilikken joq. Sebebin suraǵanymyzda: «Biz Ispanııada negizinen basqa qashyqtyqta atýdan daıyndalamyz. Bul jaqtyń talaby ózgesheleý eken. Qarsylastarymyz shetinen «sen tur, men ataıyn» eken», dep jaýap qatty.
V Dúnıejúzilik kóshpeliler oıyndarynyń bir ereksheligi – buǵan tek ótken tarıhynda kóshpeli ǵumyr keshken elder ǵana emes, otyryqshy halyqtardyń da ókilderiniń qatysyp jatqandyǵy. Ispanııadan kelgen keıipkerlerimizdiń de ata-babalary kóshpeli bolmaǵan. Tipti «kóshpeli ómir súrý salty» degen túsinik joq ekenin aıtady.
«Men óz áýletimniń ishinde dástúrli sadaq atý sportymen shuǵyldana bastaǵan birinshi adammyn. Bizdiń elde olımpıadalyq sadaq atý túrimen aınalysatyndar kóp. Al búgingideı dástúrli sadaq atý sporty endi ǵana tanymal bolyp keledi», deıdi M.Djımenes.
«Áıelim – álemniń 12 dúrkin chempıony»
V Dúnıejúzilik kóshpeliler oıyndary barysynda biz áńgimelesken taǵy bir erli-zaıypty jup – Majarstannan kelgen sadaqshylar Tomas Hýneı men Emoke Domokos. Olar – Býdapesht qalasynyń turǵyndary. T.Hýneı óziniń dástúrli sadaq atýmen shuǵyldanyp kele jatqanyna 14 jyl bolǵanyn aıtady.
«Biz áıelim ekeýmiz de osy sport túrimen kópten aınalysyp kelemiz ári muny qatty jaqsy kóremiz. Jarystarǵa da únemi birge baramyz. Osy jyldar ishinde álemniń túkpir-túkpirinde ótken talaı týrnırde baq synadyq. Al Qazaqstanǵa birinshi ret taban tiredik. Maǵan sizderdiń elderińiz de, astanalaryńyz da unady. Jarystyń ózi óte joǵary deńgeıde uıymdastyrylyp jatyr. Tyńǵylyqty daıyndyq bolǵany baıqalady. Al jergilikti turǵyndar – múldem bólek taqyryp. Biz munda tek kúlip júretin kóńildi adamdardy ǵana kórip jatyrmyz», dep aǵynan jaryldy ol.
Tomas Hýneı – dástúrli sadaq atýdan álemniń 3 dúrkin chempıony. Sońǵy ret Ońtústik Koreıanyń Inchhon qalasynda ótken birinshilikte top jarǵan. Al onyń jubaıy Emoke Domokos áıelder arasynda álemniń 12 dúrkin chempıony! Sondaı-aq ol osy oıyndarda da 11 qyrkúıek kúni ótken «Jamby» stılindegi dástúrli sadaq atýdan kúmis medaldy moınyna taqty.
Biz majar halqy Eýropanyń qaq tórinde otyrǵan ult bolsa da, burynǵy kóshpelilerdiń urpaǵy ekenin jaqsy bilemiz. Erli-zaıyptydan ata-babalarynan daryǵan qandaı da bir kóshpelilik qasıet týraly suradyq. «Men – majarmyn. Boıymda kóshpeliliktiń qany bar ekenin sezemin. Tipti meniń arǵy tegim – qypshaq. Qazaq-majar – bir týǵan», dedi T.Hýneı.
Qazirgi tańda majarlyq sadaqshylar álemdegi aldyńǵy qatarly quramalardyń biri sanalady. Buǵan túrli týrnırde osy el ókil-deriniń únemi top jaryp júrgeni jaqsy dálel. Mysaly, Astanadaǵy Dúnıejúzilik kóshpeliler oıyndaryna kelgen sadaqshynyń biri Laslo Koska – álemniń birneshe dúrkin jeńimpazy. Ol osy týrnırdiń ózinde 10-11 qyrkúıek kúnderi dástúrli sadaq atýdan bir altyn, bir kúmis medal enshilep úlgerdi.
