Osyǵan oraı elimizdiń Qarýly kúshteri jyl basynan beri birqatar halyqaralyq oqý-jattyǵý jıynyna qatysyp keledi. Sonyń biri – 10 qyrkúıekte bastalǵan Qazaqstan men О́zbekstan áskerı-áýe kúshteri áskerı qyzmetshileriniń «Ashyq aspan-2024» halyqaralyq jedel-taktıkalyq komandalyq-shtabtyq oqý-jattyǵýy. Bul jıyn búgin, ıaǵnı 14 qyrkúıekte aıaqtalady.
Oqý-jattyǵý dostas elder áskerı basqarý organdarynyń úılesimdiligin arttyrýǵa, áýe shabýylyna qarsy qorǵanys kúsh-quralyn birlesip qoldaný máselelerin pysyqtaýǵa, jaýyngerlik kezekshilik atqarýdyń erekshe jaǵdaılarynda komandırlerdiń áskerı bólimderdi basqarýdaǵy praktıkalyq daǵdylaryn shyńdaýǵa baǵyttalǵan.
Is-sharaǵa maıdan tikushaqtary, armııa jáne áskerı-kólik avıasııasynyń ushaqtary, sondaı-aq Áýe shabýylyna qarsy qorǵanys áskerleriniń kúsh-quraldary qatysyp jatyr. Oqý-jattyǵý barysynda Áskerı-áýe kúshteriniń ushqyshtary Qyrǵyzstan men Tájikstannyń áýe keńistiginde de ushý jattyǵýlaryn oryndady.
«Ashyq aspan-2024» jedel-strategııalyq komandalyq-shtabtyq oqý-jattyǵýy Qazaqstan Qarýly kúshteri Áýe qorǵanysy kúshteriniń bas qolbasshysy, avıasııa general-leıtenanty Dáýren Qosanovtyń basshylyǵymen ótip jatyr.
– Bul – bizdiń elimizde jyl saıyn turaqty túrde ótetin mańyzdy is-shara. Dostas elderdiń áskerı qyzmetshilerine áýe shabýylyna qarsy qorǵanys, jaýyngerlik eseptoptardy úılestirý jónindegi birlesken mindetterdi oryndaý kezinde tájirıbe jınaqtaýǵa, eki eldiń qorǵanys qabiletin arttyrýǵa múmkindik beredi, – dep atap ótti D.Qosanov.
Oqý-jattyǵý barysynda memlekettik shekara nemese áýe keńistigin paıdalaný qaǵıdalary buzylǵan jaǵdaılarda Áýe qorǵanysy kúshteriniń komandalyq pýnktterimen jáne shektesip jatqan memleketterdiń (Qyrǵyzstan, Tájikstan, О́zbekstan) basqarý pýnktterimen ózara is-qımyl jasaý tártibi pysyqtaldy. Sonymen qatar Táýelsiz memleketter dostastyǵynyń birikken áýe shabýylyna qarsy qorǵanys júıesiniń jaýdyń áýeden jasalǵan shabýylyn toıtarýǵa baǵyttalǵan is-qımyl daıyndyǵy tekserildi.
Taıaý kúnderi elimizdiń aýmaǵynda uıymdastyrylǵan taǵy bir áskerı jıyn – «Sheksiz baýyrlastyq-III» oqý-jattyǵýy. Túrkistan oblysy aýmaǵynda baıraǵy jelbiregen is-sharaǵa Ázerbaıjan, Qatar, Pákistan, Túrkııa, О́zbekstan jáne Qazaqstannyń arnaıy maqsattaǵy bólimsheleri qatysyp, jaýyngerlik mindetterin pysyqtady. Taýdaǵy «Orda» polıgonynyń oqý-jattyǵý oryndarynda arnaıy jasaqtar taktıkalyq atys, mergendik saıys, parashıýtten sekirý jáne taý daıyndyǵy boıynsha tájirıbelik jattyǵýlardy oryndady. Árbir áskerı qyzmetshi – jaralanǵan adamǵa medısınalyq kómek kórsetý tásilderin meńgergen, baılanys quraldaryn qoldana alady jáne kez kelgen qarýdy qoldanýdyń sheberi. Sonymen qatar bul jıynda áskerı qyzmetshiler sheteldik áriptesteri qoldanatyn taktıkalyq ádisterdi meńgerýge múmkindik aldy.
Oqý-jattyǵýǵa qatysýshylardyń aldyna shartty túrdegi eldi mekenge shoǵyrlanǵan zańsyz qarýly toptyń jolyn jaýyp, kózin joıý mindeti qoıyldy. Ony oryndaý kezinde shynaıy urys jaǵdaıyna barynsha jaqyn jaǵdaıda ózara úılesimdi de tıimdi áreket etý qabileti tekserildi.
Áskerı qyzmetshilerdiń pikirinshe, mundaı is-sharalar kontıngentterdiń jaýyngerlik deńgeıin arttyrýǵa yqpal etedi jáne óńirde beıbitshilik pen qaýipsizdikti qamtamasyz etý maqsatynda birlesip is-qımyl jasaýǵa múmkindik beredi.
