Infografıkany jasaǵan – Záýresh SMAǴUL ,«EQ»
«Jastarymyz deni saý, myqty azamat bolyp ósýi kerek. Sondyqtan ult saýlyǵyn saqtaý úshin buqaralyq sporttyń mańyzy aıryqsha. Jaqynda men Olımpıadaǵa qatysýshylarmen kezdestim, sporttaǵy naqty mindetter men basymdyqtarǵa toqtaldym. Shyn máninde, bul saladaǵy zańnamany jańartatyn kez keldi. Zańǵa engiziletin ózgertýler buqaralyq sport pen balalar sportyn damytýǵa zor serpin berýi tıis. Sondaı-aq bolashaq jeńimpazdar shoǵyryn daıarlaýǵa jol ashady. Depýtattar osy mańyzdy zań jobasyna aıryqsha mán bergeni jón dep sanaımyn», degen Memleket basshysy jańa zań jobasyn qaıta pysyqtap, áli de shırata túsý qajettigin júktedi.
Buqaralyq sportty damytý – eldiń saýlyǵyn nyǵaıtý. Árıne olımpıadalyq sport túrlerine erekshe kóńil bólip, qarjyny qazymyrlanbaı quıyp, chempıondardy daıarlaý memlekettiń mártebesi úshin kerek. Buǵan jetý jolynda balalar men jasóspirimder sportynyń qazirgi ahýaly qandaı, bizde izbasarlar daıarlaý isi qanshalyqty qarqyn alyp keledi? Osyǵan jete mán bergen jón.
Saılaýshylarmen kezdesýde, el aralaý kezinde sport mektepterine de arnaıy soǵyp, tynys-tirshiligimen tanysamyz. Jaqynda Almaty qalasyndaǵy «Shańyraq» Olımpıada rezerviniń respýblıkalyq mamandandyrylǵan mektep-ınternat-kolledjinde bapkerlermen, sportshylarmen júzdesip, jaı-kúıimen tanystym. Olımpıada rezervin daıyndaıtyn bilim ordasynda elimizdiń bolashaq sport juldyzdary ósip keledi. Bapkerlermen tildesip, qazirgi sport salasynyń jaı-kúıin tarazyladyq. Bizdiń sportshylardyń fızıkalyq daıyndyǵy kemshin soǵyp tur. Ony bıyl ótken Parıj jazǵy Olımpııa oıyndarynda baǵamdadyq.
Sportshylardyń tez entigip qalýynyń birneshe sebebi bar. Birinshiden, zamanaýı dárýmen túrleri jetispeıdi. Sonyń jetispeýshiliginen sportshylardyń ókpesi qaǵyp, alqynyp qalady da, uzaq kúrese almaıdy. Ekinshiden, qazirgi oqý-jattyǵý tásilderi ábden eskirgen. Jańashyldyq, jankeshtilik joq. Úshinshiden, sportshylardyń jarystarǵa tyńǵylyqty daıyndalýdyń ornyna toı-tomalaqtan qoldary bosamaıdy. Osyndaı júıeli kemshilikter kesirinen nátıjemiz tómen bolyp jatyr. Sondyqtan Parıjdegi qatelikterden sabaq alyp, ár sport túri boıynsha tereńdeı taldap, kemshilikti toltyrý mańyzdy.
Memleket basshysy buqaralyq sportty damytýǵa da kúsh salýdy mindettedi. Endeshe, aýyldarǵa da qalalyq órkenıet barýy tıis. Halyq tyǵyz ornalasqan aýyldarda sporttyq saýyqtyrý keshenderi boı kóterip, shaǵyn eldi mekenderde de sporttyq alańdar salynsa quba-qup. Sporttyq zaldar jetispeıtin aýyldar da bar. Balalar sportyn damytý arqyly biz ult saýlyǵyn arttyramyz. Túrli jobalar, arnaıy baǵdarlamalar da ashylyp jatyr. Sonyń ıgiligin halyq kórýi tıis.
Danııar QASQARAÝOV,
Májilis depýtaty
