Kollajdy jasaǵan – Qonysbaı ShEJIMBAI, «EQ»
Áleýmettik medısınalyq saqtandyrý qorynyń basqarma tóraǵasy Ábilqaıyr Sqaqov Densaýlyq saqtaý mınıstrliginiń Qoǵamdyq keńesinde qarjylandyrýǵa qatysty qalyptasqan mán-jaıdy ashyp aıtyp berdi. Spıker 8 aıda qordyń negizgi baǵyttary boıynsha iske asqan jumystyń qorytyndysyn jasap, qysqamerzimdi jospar týraly málimdedi. Esepti kezdesýge Densaýlyq saqtaý mınıstri Aqmaral Álnazarova da qatysty.
Áleýmettik medısınalyq saqtandyrý qory – medısınalyq qyzmetterdiń strategııalyq satyp alýshysy ári tóleýshisi bolǵandyqtan, Ábilqaıyr Sqaqov jyl basynan beri medısınalyq kómekti satyp alý qorytyndysy men ony medısınalyq uıymdarǵa bólý barysy týraly aıtty. Bıyl qorda satyp alý oıdaǵydaı, barynsha avtomatty túrde ótse de, qarjylandyrýǵa qatysty týyndaǵan máseleler bar.
«Tapshylyqty aıtar bolsaq, bastapqy qarjylandyrý boıynsha – 116 mlrd jáne burynnan kele jatqany – 571 mlrd teńge shamasynda. Biz Densaýlyq saqtaý mınıstrligimen, jergilikti atqarýshy organdarmen birge qarjylyq turaqtylyq josparyn bekittik jáne qarajatty únemdeýge baǵyttalǵan is-sharalardy qabyldadyq. Qazir daǵdarys boıynsha tapshylyqtyń 70%-y jabyldy. Alaıda jyl sońyna deıin qarajat tapshylyǵy túbegeıli jaqsarmasy anyq. Aqshalaı ótimdiliktiń bolmaýy – Densaýlyq saqtaý mınıstrligine nemese Qorǵa baılanysty emes obektıvti faktor. Jyl sońyna deıin ýaqtyly tólemder bolmaýy múmkin», dep atap ótti basqarma tóraǵasy.
Búginde Qorda qarajat tapshylyǵy shyǵyndardy jáne Qor qabyldaǵan mindettemelerdi ońtaılandyrý esebinen de sheshilip jatyr. Osylaısha, Qor asa mańyzdy kómek túrleri boıynsha qaryz somasyn 116 mlrd teńgeden 27 mlrd teńgege deıin azaıta aldy. Sonymen birge Qorda medısınalyq qyzmetterdiń tarıfterin jetildirý jumystary tolastaǵan joq. Bes baǵyt boıynsha tarıfter qaıta qaralyp, kúshine engen. Taǵy toǵyz baǵyt boıynsha jumys osy aıda aıaqtalady.
Á.Sqaqov medısınalyq uıymdardy baqylaý nátıjeleri, MÁMS qamtý aıasyn keńeıtý, Qordyń aǵymdaǵy jumysy jáne kadrlyq saıasaty týraly da esep berdi. Sonyń ishinde sıfrlandyrýǵa qatysty máseleler sóz bolyp, qor basshysy keńes múshelerine ahýaldyq-taldamalyq ortalyqtyń jumysyn tanystyrdy. «Saqtandyru» aqparattyq júıesi týraly habarlady. Densaýlyq saqtaý mınıstri Aqmaral Álnazarova sıfrlandyrýǵa qatysty máselelerdi retteýdiń mańyzyna toqtaldy.
– Memleket basshysy sıfrlandyrýdyń jetilmegenin aıtyp, birneshe mindet júktedi. Búginde salanyń sıfrlyq transformasııasy boıynsha Jol kartasy bekitildi. Memleket basshysynyń qoldaýymen Respýblıkalyq elektrondy densaýlyq saqtaý ortalyǵy Densaýlyq saqtaý mınıstrligine qaıta berildi. Bul júıeni jetildirý máselelerin tezirek sheshýge múmkindik beredi dep oılaımyn, – dedi mınıstr.
Densaýlyq saqtaý mınıstrligi Qoǵamdyq keńes tóraǵasy Nadejda Petýhova Qorda ahýaldyq-taldamalyq ortalyqtyń iske qosylýy salanyń tıimdiligin arttyryp, medısınalyq qyzmetterdiń sapasyn jaqsartýǵa septesetinin aıtty.
– Qor turaqsyz qarjylyq jaǵdaıda jumys isteýge májbúr. Biz Qordyń medısınalyq uıymdardyń jumysyna, qarjylandyrý ádisterine, olardy baqylaý boıynsha naqty túsinigi, ustanymy bar ekenin kórdik. Qor Densaýlyq saqtaý mınıstrligimen birge ortaq maqsattarǵa jetýge umtylatynyn baıqatyp otyr. Rasynda, densaýlyq saqtaý salasyndaǵy máselelerdi retteýge kelgende birlesip tyndyrǵan is nátıjesin beredi, – deıdi N.Petýhova.
Qoǵamdyq keńeste Áleýmettik medısınalyq saqtandyrý qorynyń basqarma tóraǵasy Á.Sqaqov keler jyldyń jumys jospary týraly da baıandady. Ashyqtyq pen eseptilik qaǵıdalaryna negizdelgen jospar medısınalyq qyzmetterdiń biryńǵaı satyp alýshysy men tóleýshisi retindegi basymdyqtar boıynsha naqty qadamdardy qamtıdy.
