Memleket basshysy Ulttyq quryltaıda sóılegen sózinde: «Shyn máninde, ozyq oıly ult bolýdyń eń tóte joly – kitap oqý. Sondyqtan kitap oqý mádenıetin qoǵamda barynsha ornyqtyrýymyz kerek», degen bolatyn. Bıyl ekinshi márte ótip jatqan qaztalovtyq kitapqumarlar saıysyna qarap, Prezıdenttiń tapsyrmasy shalǵaıdaǵy aýdanda shyn máninde júzege asyp jatqanyn kórdik.
Bıyl baıqaý erejesinde ózgeris bar eken. Oqýshylardyń jas ereksheligi, oqý deńgeıi eskerilip, 5–7 jáne 8–11 synyp oqýshylaryna arnalǵan kitaptar tizimi bekitilgen. Júlde qory da molaıyp, 2 mln teńge bolǵan. Baıqaý test jáne áńgimelesý syndy eki kezeńnen turdy. Oqýshylar jaz boıy oqyǵan kitaptaryn eske túsirip, rýhanı synǵa tústi.
«Men oqyǵan 30 kitap» baıqaýy aýdanymyzda ekinshi márte ótip jatyr. Bul – bilimge qanat qaqqan oqýshyny jigerlendirip, zııaly ult qalyptastyrýǵa septigin tıgizetin dástúrli joba. Rýhanııatymyzdy kemeldendirip, urpaǵymyzdyń zeıinin ashyp, talabyn shyńdaýǵa, aýyl balalarynyń kitapqa qumarlyǵyn arttyrýǵa qoldaý kórsetkeni úshin ustazdarǵa, kitaphanashylarǵa, ata-analarǵa rızashylyǵymdy bildiremin», deıdi aýdan ákiminiń orynbasary Serik Qaıyrlıev.
Baıqaý qorytyndysyna sáıkes qazylar sheshimimen kitapqumarlardyń kishi tobynda Qaraózen mektep-lıseıiniń oqýshysy Ramına Tilemisova bas júldege ıe bolsa, II oryndy qaraózendik Aısha Rahımova jeńip aldy. III oryndy qaraózendik Sánim Turarbek pen qaraobalyq Ázıza Erejep bólisti.
Al 8–11 synyp oqýshylary arasyndaǵy dodada Tereńkól mektep-bóbekjaıynyń oqýshysy Nuraıym Rahmetke eshkim teń kelmedi. Qaztalov mektep-lıseıiniń oqýshysy Bahtııar Tolıatı – II oryn, Qaraózen mektep-lıseıiniń oqýshysy Aıaýlym Tilepbergen men Bostandyq orta mektebiniń oqýshysy Aıman Marks III orynǵa taban tiredi.
Baıqaý jeńimpazdary qarjylaı syılyqqa ıe boldy. Atap aıtsaq, I oryn úshin – 300 myń, II oryn úshin – 200 myń, III oryn úshin – 100 myń teńge buıyrdy. Al qalǵan qatysýshylar 30 myń teńgelik yntalandyrý syılyǵyn qanaǵat tutty.
«Men oqyǵan 30 kitap» baıqaýy kanıkýl kezinde oqýshyǵa berilgen tapsyrma dese de bolady. Bir baıqaǵanym, qaztalovtyq oqýshylar eresekterdiń eskertýinsiz-aq kitap oqýǵa qushtar eken. Oqýshylardyń, ul-qyzdarymyzdyń ıntellektýaldyq dáreje deńgeıin kóteretin mundaı bastamany oblys, tipti Qazaqstan boıynsha nasıhattaý qajet», deıdi Prezıdent janyndaǵy Ulttyq quryltaı múshesi, jazýshy-jýrnalıst, «Oral óńiri» oblystyq qoǵamdyq-saıası gazetiniń bas redaktory, Qazaqstan Jazýshylar odaǵynyń Batys Qazaqstan oblysyndaǵy ókili Baýyrjan Ǵubaıdýllın.
Batys Qazaqstan oblysy
