Ǵylym jáne joǵary bilim mınıstrliginiń habarlaýynsha, forýmǵa qatysqan delegasııa quramynda qazaqstandyq tehnıkalyq ýnıversıtetterdiń ókilderi, sondaı-aq «Qazmunaıgaz» kompanııasy men «Kazservice» Qazaqstan munaı servıstik kompanııalary odaǵynyń ókilderi de bar. Jıynǵa Reseıdiń 60-tan asa aımaǵynan jáne Qazaqstan, Belarýs, О́zbekstan, Egıpet, Kýveıt jáne Saýd Arabııasynan kelgen 800-den astam kompanııa ókilderi men 12 myńnan kóp adam qatysty.
TNF forýmy – otyn-energetıka kesheniniń ózekti máselelerin talqylaýǵa arnalǵan eń iri alańdardyń biri. Bul is-shara jyl saıyn ónerkásipshilerdi, jer qoınaýyn paıdalanýshylardy, qurylysshylardy, memlekettik qyzmetkerler men sarapshylardy jınaıdy. Bıylǵy forýmǵa «Tehnologııalyq turaqtylyq: damý strategııasy» taqyryby arqaý bolǵan.
Forým barysynda Ǵylym jáne joǵary bilim mınıstriniń orynbasary Talǵat Eshenqulov Túmen oblysy gýbernatorynyń orynbasary Andreı Raıdermen kezdesti. Kezdesý barysynda Qazaqstan men Reseıdiń joǵary bilim salasyndaǵy yntymaqtastyǵy talqylandy. Is-sharada ǵylym men joǵary bilimdi damytýdyń jańa baǵyttaryn eskere otyryp, tehnıkalyq ýnıversıtetter arasyndaǵy ózara árekettestiktiń tıimdi úlgileri týraly oılar da ortaǵa salyndy.
T.Eshenqulov túmendik jastardy Qazaqstannyń joǵary oqý oryndarynda, onyń ishinde akademııalyq utqyrlyq baǵdarlamasy aıasynda bilim alýǵa shaqyrdy. Qazaqstandyq delegasııany resmı qabyldaý kezinde Túmen oblysynyń gýbernatory Aleksandr Moor otyn-energetıka keshenin damytý úshin yntymaqtastyq pen uzaqmerzimdi jobalardy iske asyrýda jańa tehnologııalyq sheshimder men seriktesterdiń qajet ekenin atap ótti. Forým qatysýshylaryna sessııalar men munaı-gaz salasyndaǵy tehnologııalar men prosester boıynsha dóńgelek ústelder uıymdastyryldy.
