foto: QR Qorǵanys mınıstrligi
Osy ýaqytqa deıin áskerı qyzmetshilerdiń jyljymaıtyn múlik quqyǵyn ıelený úshin ótinish berýden bastap tirkeýge deıingi merzimi eki jylǵa deıin sozylǵan bolsa, elektrondyq servıs engizilgennen keıin búkil prosess eki aıdan aspaıtyn ýaqytta iske asyrylady. Servıs «E-qazyna» sıfrlyq platformasynda ornalasqan. Ony ázirleýshi QR Qarjy mınıstrliginiń «Aqparattyq-esepke alý ortalyǵy» AQ.
Endi áskerı qyzmetshiler anyqtamalar jınap, ártúrli vedomstvolardyń tabaldyryǵyn tozdyrmaı, barlyq is-áreketti tek platforma arqyly júzege asyrady. Kóptegen anyqtamalar men tekserýler memlekettik derekter bazasymen ıntegrasııalaý arqyly júıelik formatty-logıkalyq baqylaýǵa aýystyrylady.
Qorǵanys mınıstrliginiń málimdeýinshe búginde turǵyn úıin jekeshelendirýge 3,5 myń áskerı qyzmetshi ótinish bergen. Jekeshelendirý quqyǵyn 10 jyldan astam qyzmettik turǵyn úıde turatyndar paıdalana alady, bul rette ótinish berýshi jekeshelendirý kezinde qaldyq qunyn engizýi tıis. Qyzmettik turǵyn úıde 20 jyldan astam turatyndar óteýsiz jekeshelendirýge quqyly, ıaǵnı olar memleketten páterdi tegin ala alady.
Qanatqaqty joba 19 qyrkúıekte bastalyp, 2025 jyldyń basyna deıin jalǵasady.
