foto QR Ekologııa jáne tabıǵı resýrstar mınıstrligi
WWF qoldaýymen Qazaqstan Respýblıkasynyń Orman sharýashylyǵy jáne janýarlar dúnıesi komıteti men Nıderlandynyń Svıatoı Lva ortalyǵy arasynda Memorandým jasaldy. Memorandýmda 2 jolbarysty aqysyz berý jáne olardy Qazaqstanǵa jetkizý týraly kelisim boldy.
Bul oqıǵa ekojúıeni qalpyna keltirý jáne joǵalǵan bıoártúrlilikti qaıtarý jolyndaǵy mańyzdy qadam. Baǵdarlamany ekologııa jáne tabıǵı resýrstar mınıstrliginiń Orman sharýashylyǵy jáne janýarlar álemi komıteti WWF jáne BUUDB-nyń qoldaýymen júzege asyrýda.
«Osydan shamamen 15 jyl buryn, 2010 jyly ótken Jer betinde jolbarystardy saqtap qalý máseleleri boıynsha alǵashqy halyqaralyq forýmda Qazaqstan mysyqtuqymdas jabaıy jyrtqyshty elimizdiń tabıǵatyna qaıta qabyldaýǵa daıyn ekendigin habarlaǵan bolatyn. Arada jeti jyl ótkennen keıin Qazaqstan, Reseı jáne basqa da elderdiń ǵalymdarynyń tynymsyz eńbegi nátıjesinde elimizde jolbarysty qaıta jersindirýdiń biregeı baǵdarlamasy ázirlendi. Osy ýaqyt aralyǵynda alańy 415 myń gektar jerdi qamtıtyn «Ile-Balqash» rezervatyn qurýdan bastap ońtústik Balqash mańy ekojúıesin qaıta qalpyna keltirýge deıin úlken jumys atqaryldy. Qazirgi tańda biz kóp eńbekti talap etetin jumystyń jáne qyzmetkerlerimizdiń óz isterine adaldyǵynyń nátıjesin kórip otyrmyz. Qazaqstanǵa alǵashqy jolbarystar jetkizildi jáne osy ataýly oqıǵa baǵdarlama mindetteriniń sátti oryndalǵanyn rastaıdy», dedi QR Ekologııa jáne tabıǵı resýrstar mınıstri Erlan Nysanbaev.
Mınıstrliktiń aıtýynsha Bogdana men Kýma «Ile-Balqash» rezervatyndaǵy WWF-tyń arnaıy qurylǵan volerlik ortalyǵynda ómir súredi, keıin olardyń urpaǵy tabıǵatqa jiberiledi.
