Zań klınıkasy – elimizde kásibı daǵdylardy ǵana emes, sonymen qatar zań jáne quqyqtyq tártipti nyǵaıtýda áleýmettik jaýapkershilikti tereń sezinetin zańgerlerdiń jańa býynyn tárbıeleýge baǵyttalǵan áleýmettik joba.
Is-sharanyń ashylýynda ýnıversıtet prezıdenti Qanat Qojahmet: «Zań klınıkasy stýdentterdi teorııalyq bilimmen qatar dýaldy bilim berý formatyndaǵy praktıkalyq daǵdyny damytady».
Uly Abaı aıtyp ketken «Adasqannyń aldy – jón, arty – soqpaq» támsildi eske alǵan ýnıversıtet basshysy «Bir top adam birin-birimen qol ustasyp, qarańǵy túnekte bilim izdep saparǵa shyǵady. Ustazy qarańǵyda aıaq astynan tas kezikse, kóterip ala júrińder kerek bolady deıdi. Túnekten jaryqqa shyǵar aldynda esik tars jabylyp, sonda ustazy, kim tas arqalap kele jatyr? Kerek bolady, jaryqqa shyǵatyn jol osy arqalaǵan tastaryńyz depti. Tas kótergender jaryqqa shyǵyp qarasa, aıaq aıastynan terip alǵandary jaýhar tas bolyp shyǵady. Sondyqtan bilim izdegen jastar árdaıym óziniń jaýhar tastaryn adaspaı tapsyn», dep sózin qorytyndylady.
Quqyq jáne memlekettik basqarý mektebiniń zań klınıkasynda stýdentter bilikti ustazdardyń jetekshiligimen naqty isterge qatysyp, qujattar ázirlep, klıenttiń múddelerin qorǵap, zań kómegin kórsetip, teorııalyq bilimderin is júzinde qoldanýǵa múmkindik alady. Ýnıversıtet professory Gúlmıra Sultanbaeva atap ótkendeı, atalmysh praktıka bilim alýshylardyń materıaldy jaqsy meńgerýine, kásibı damýyna yqpal etedi. Klınıka stýdentterdiń quqyqtyq máselelerdi sheshý, synı oılaý jáne toptyq jumys oryndaý, sondaı-aq kommýnıkasııa, taldaý, dáleldeý jáne sheshim qabyldaý daǵdylaryn damytýǵa arnalǵan alań retinde qyzmet etedi. Zań klınıkasy stýdentterge, ata-analarǵa, Almaty turǵyndaryna qoldanystaǵy Qazaqstan zańnamasy, quqyqtyq normalaryn qoldanýdyń ózekti máseleleri boıynsha aqysyz keńester usynady. Tegin zań kómegin kórsetý stýdentterdiń qoǵamdyq problemalarǵa qatysýyna jol ashyp, kásibı damýyna negiz bolmaq.
Is-shara barysynda «Narhoz ýnıversıteti» KEAQ men Komplaens jáne iskerlik etıka qaýymdastyǵy, respýblıkalyq advokattar alqasy, Almaty advokattar alqasy, Almaty oblystyq advokattar alqasy, «ZAŃ» Medıa-korporasııasy arasynda yntymaqtastyq týraly memorandýmǵa qol qoıyldy. Ashylý aıasynda is-sharaǵa qatysýshylar men qonaqtar úshin kampýs-týr ótti.
Zań klınıkasy Almaty qalasy, Jandosov kóshesi, 55, 1 qabat, bas kampýs kireberistiń sol jaǵynda ornalasqan.
