Zań klınıkasy quqyqtyq kómek kórsetedi

Is-sharanyń ashylýynda ýnıversıtet prezı­denti Qanat Qojahmet zań klınıkasy stýdentterdi teorııalyq bilimmen qatar dýaldy bilim berý for­matyndaǵy praktıkalyq daǵdyǵa baýlýǵa yqpal etetinine toqtaldy.

– Bir top adam bir-birimen qol ustasyp, qarańǵy túnekte bilim izdep saparǵa shyǵady. Ustazy qarańǵyda aıaqastynan tas kezikse, kóterip ala júrińder, kerek bolady deıdi. Túnekten jaryqqa shyǵar aldynda esik tars ja­bylǵanda ustaz: «Kim tas arqalap kele jatyr? Jaryqqa shyǵatyn jol – osy arqalaǵan tastaryńyz», depti. Tas kótergender jaryqqa shyǵyp qarasa, aıaq­astynan terip alǵandary jaýhar tas bolyp shyǵady. Sondyqtan bilim izdegen jastar árdaıym óziniń jaýhar tastaryn adaspaı tapsyn, – dep Q.Qojahmet jastardy jigerlendirdi.

Quqyq jáne memlekettik basqarý mektebiniń zań klınıkasynda stýdentter bilikti ustazdardyń jetek­shiligimen is júrgizýdi úırenip, qujat­tar ázirlep, múddelerin qorǵap, zań kómegin kórsetip, teorııalyq bilimin is júzinde qoldanýǵa múmkin­dik alady. Ýnıversıtet professory Gúlmıra Sultanbaeva atap ótkendeı, bul praktıka bilim alýshylardyń taqyrypty jaqsy meńgerýine, kásibı damýyna yqpal etedi. Klınıka stýdentterdiń quqyqtyq máselelerdi sheshý, synı oılaý ári toptyq jumys oryndaý, sondaı-aq kommýnıkasııa, taldaý, dáleldeý, sheshim qabyldaý daǵdylaryn damytýǵa arnalǵan alań retinde qyzmet etedi. Zań klınıkasy stýdentterge, ata-analarǵa, qala turǵyndaryna qoldanystaǵy zańnamalar, quqyqtyq normalarǵa qa­tysty aqysyz keńester usynady. Tegin zań kómegin kórsetý stýdentterdiń qoǵamdyq máselelerge belsene qatysýyna jol ashyp, kásibı damýyna negiz bolmaq.

Is-shara barysynda Narhoz ýnı­versıteti men Komplaens jáne isker­lik etıka qaýymdastyǵy, respýblıka­lyq advokattar alqasy, Almaty advo­kat­tar alqasy, Almaty oblystyq advokattar alqa­sy, «Zań» medıa-korpora­sııasy arasynda ynty­maq­tastyq týraly memorandýmǵa qol qoıylyp, qaty­sýshylar kampýs-týrǵa qatysty.

Sonymen Almaty qalasyndaǵy «Zań klınıkasyna» kelip tegin keńes alýǵa bolady.

ALMATY