Sýretterdi túsirgen – Erlan OMAR, «EQ»
«Qazmedıa» ortalyǵynda ótken marapattaý rásimi aldynda baıqaýǵa qatysýshylar arnaıy jaıylǵan qyzyl kilem ústimen júrip ótti. Is-sharaǵa Mádenıet jáne aqparat mınıstri Aıda Balaeva qatysyp, kirispe sózinde «Úrker» ulttyq syılyǵy úshin baǵyn synap kórýge nıet bildirgen barlyq áriptesine alǵysyn jetkizdi. Sondaı-aq bul syn óz kezeginde otandyq medıa salasynyń damýyna eleýli septigin tıgizetinin aıtty.
BAQ ókilderiniń jumystaryn belgili sala mamandary, jýrnalıster, halyqaralyq medıa-sarapshylardan quralǵan táýelsiz qazylar alqasy baǵalap, úzdikterdi anyqtaǵan edi. Sonymen baıqaý qorytyndysy boıynsha «Jyldyń úzdik reportajy» atalymynda Nur.kz saıtynyń ókili Iýlııa Abramova úzdik dep tanyldy. «Áleýmettik taqyryptaǵy úzdik materıal» atalymy boıynsha Time.kz saıtynyń tilshisi Ksenııa Evdokımenkoǵa teń keler eshkim bolmady.
«Jyldyń úzdik suhbaty» atalymynda Inbusiness.kz portalynyń tilshisi Nurlan Orazǵalıev (Inbusiness.kz) jeńimpaz atandy. Al «Jyldyń úzdik jýrnalıstik zertteýi» atalymy boıynsha Nurlat Baıkenje («Astana aqshamy» gazeti) oza shaýyp, bas báıgeni enshiledi.
Sonymen qatar «Jyldyń úzdik analıtıkalyq materıaly» atalymynda – Tımýr Nıtalıev (Ulysmedia.kz); «Radıostansadaǵy úzdik joba» atalymynda – Qymbat Dosjan (Qazaq radıosy); «Jyldyń úzdik fotosýreti» atalymynda – Salı Sabırov (Olympic.kz); «Halyqaralyq BAQ-ta Qazaqstan týraly jarııalanǵan úzdik materıal (baspa, radıo, ınternet-jýrnalıstıka salasynda)» atalymynda Torǵyn Ashenova («Omby qazaqtary» gazeti) jeńiske jetti.
Úzdik ujymdar saıysynda da baǵy janǵan buqaralyq aqparat quraldary belgili boldy. Atap aıtqanda, Abai.kz «Jyldyń úzdik jańalyqtar portaly» atansa, «Úzdik óńirlik BAQ» synynda «Nash Kostanaı» gazeti eshkimge des bermedi.
Sondaı-aq «Úzdik podkast» atalymynda – NeQuryltay; «Úzdik YouTube kanaly» atalymynda Sayahat Time (balbal.kz) oza shapty.
Negizgi atalymdardan bólek, «Vremıa» gazeti ujymyna Mádenıet jáne aqparat mınıstri Aıda Balaeva arnaıy syılyqty tabystady. Buǵan qosa balalar jazýshysy Berdibek Soqpaqbaevtyń 100 jyldyq mereıtoıyna oraı taǵaıyndalǵan marapat «Zań» gazetine buıyrdy.
Aıta ketsek, júzden júırik shyqqan ár qatysýshyǵa «Úrker-2024» estelik músinshesi men 1 mln teńge kóleminde aqshalaı syıaqy tabystaldy.
«Úzdik suhbat» atalymynda jeńimpaz bolǵan jýrnalıst Nurlan Orazǵalıev bul marapat onyń shyǵarmashylyq jolyndaǵy eleýli oqıǵa ekenin aıtady.
«Qolyna qalam ustaǵan árbir jýrnalıst úshin eńbeginiń elengeni – jaqsy. Halyqtyń yqylasy men memlekettiń baǵalaýy bizge shabyt beredi, jańa belesterdi baǵyndyrýǵa yntalandyrady. Jýrnalıstıka salasynda eńbek etip kele jatqanyma 20 jyldan asypty. Qoǵamda qordalanǵan kóp problemany kóterdik, halyqtyń qýanyshy men qaıǵysyn birge bólistik. Mine, sol eńbek aqtalyp, «Úrker» baıqaýynyń bıylǵy jeńimpazy atanyp jatyrmyn. О́te qýanyshtymyn», dep óz oıymen bólisti.
