Búginde kishi serjant R.Batyrhanovtyń esimin enshilegen shekara bólimshesi jas shekarashy sarbazdardy batyrlyq pen patrıottyqqa úndeıtin tárbıe ortalyǵyna aınalǵan. О́zi týǵan Qatonqaraǵaıda kóshe men mekteptegi múıis batyrdyń esimimen atalady.
Al osynaý erlik qalaı jasalyp edi? 1994 jylǵy 28 qyrkúıekte Hakım bandasynyń 200-den astam qarýly sodyry 9 avtokólikpen Tájikstannyń Horog qalasy mańyndaǵy memlekettik shekara arqyly Aýǵanstanǵa ótýge bet alǵan. Olardyń jolyna 38 qazaq jáne reseılik shekarashy tosqaýyl bolyp turady.
Urysqa birinshi bolyp kirgen reseılik ofıser Konstantın Selıýk pen Radjan Batyrhanov qarýlastaryna modjahedterge tyldan shabýyldaýǵa múmkindik beredi. Alaıda urysta aýyr jaralanǵan Radjan kóp qan joǵaltyp, esin jımastan qaıtys boldy. Urystyń nátıjesinde modjahedter joıylyp, sodyrlardyń kepilindegi adamdar qutqaryldy.
Kórsetken erligi men batyldyǵy úshin kishi serjant R.Batyrhanov qaza tapqannan keıin Qazaqstan Respýblıkasy Prezıdentiniń Jarlyǵymen II dárejeli «Aıbyn» ordenimen marapattaldy. Minekı, munyń barlyǵy da Otandy sheksiz súıýdiń jarqyn úlgisi. Al táýelsizdigimizdiń 30 jyldyǵyna oraı, batyr shekarashy Tájikstan Respýblıkasynyń joǵary nagradasy I dárejeli «Spıtamen» ordeniniń ıegeri atanǵany týraly súıinshi habardyń jetkenine de úshinshi jyldyń júzi bolyp qaldy.
Bıyl 28 qyrkúıekte elimizdiń túkpir-túkpirinde shekarashy R.Batyrhanovtyń esimin ulyqtap, erligine taǵzym etýge arnalǵan is-sharalar ótti. Solardyń birqataryn UQK Shekara qyzmeti Almaty oblysy boıynsha departamenti de uıymdastyrdy. Shekarashy ardagerler men jeke quram Máńgilik alaý basyna gúl shoqtaryn qoıyp, ekinshi dúnıejúzilik soǵys batyrlaryna, sondaı-aq táýelsizdik jyldary erlikpen qaza tapqan shekarashylardyń rýhyna taǵzym jasaǵan soń, №102 orta mekteptiń oqýshylary «Jas shekarashy» áskerı-patrıottyq klýbynyń qataryna kirý úshin ant qabyldady.
Aıta keterligi, osy kúnnen bastap sol mekteptiń 7 «Á» synyby R.Batyrhanovtyń esimimen atalǵany týraly aqjarma habardy departament bastyǵynyń orynbasary, polkovnık A.Munalbaev máńgilik alaý basyna jınalǵan kópshilikke jetkizdi.
Budan ári jas patrıottar Armııa úıine baryp, I.Panfılov murajaıyn aralap kórdi.
Tamara DÁÝLETBAEVA,
UQK Shekara qyzmetiniń zapastaǵy podpolkovnıgi
