Jańa kitaptyń negizinde oqýshylar teorııalyq bilim alyp qana qoımaı, kúndelikti ómirde jıi qoldanatyn turmystyq zat úlgilerin jasaýdy úırenedi. Mysaly, «Sándik-qoldanbaly óner» taqyryby boıynsha balalar qazaqtyń ulttyq oıý-órnekteriniń tarıhymen, onyń túrlerimen, erekshelikterimen tanysady. Odan soń qazaqy oıýlardy oıyp, qorjyn, kilemshe jasaıdy.
Sabaq barysynda oqýshylar atalǵan zattardy jasaýǵa qandaı quraldar qajet ekenin anyqtap, turmystyq zattardyń qandaı materıaldardan turatynyn oqyp, úırenedi. Kitaptaǵy úlgilerge sáıkes balalar matany búkteıdi, qııady, oǵan keste salyp, ınemen jumys isteýge mashyqtanady. Keıin jasaǵan sómke, qorjyndaryna «Múıiz», «Qoshqarmúıiz», «Gúl», «О́rkesh» sııaqty ulttyq oıýlardy salady. Ony monshaq pen zer sııaqty áshekeılermen bezendiredi. Oqýshylar matany nemese qaǵazdy qııý, jabystyrý barysynda qoldary, saýsaqtary ıkemdi bola túsedi. Eńbekke qabileti artyp, shydamdy, tyńǵylyqty bolýǵa, qajet nárseni ózi jasap alýǵa jáne aınalasyn taza ustaýǵa daǵdylanady. Qandaı da bir zatty sándeıtin boıaýlardy tańdaý, oıýlardy dál qajet tusyna ornalastyrý arqyly oqýshylardyń qııaly damıdy, sýretkerlik talǵamy men túrli tústerdi seziný qabileti artady.
Eńbekke beıimdilikti arttyrýmen qatar, balalar ulttyq qundylyqtarǵa, halqymyzdyń mádenıetine qurmetpen qaraýǵa daǵdylanady. Birlese otyryp oıýly zattardy jasaý kezinde balalar jup jáne top bolyp jumys isteýge úırenedi. Bir-birimen pikir almasady. Jasaǵan zattaryn otbasyna, dostaryna tartý etip, sabaq barysynda alǵan áserleri men bilimderin bólisedi.
Aıta keteıik, oqýlyqta qosymsha tapsyrmalardy qoljetimdi etetin ári oqý materıalyn ıgerýge múmkindik beretin QR-kodtar ornalasqan. Budan bólek, sabaq aıasyn keńeıtýge múmkindik beretin jáne kilemshe men qorjyn sııaqty buıymdardy jasaýdyń shyǵarmashylyq barysyn kórsetetin oqýlyqtyń elektrondy nusqasy qosa berilgen. Bul – beınerolıkter kórsetý, aýdıo jazbalardy tyńdatý, túrli ınteraktıvti tapsyrmalardy oryndatý arqyly oqytýdy jan-jaqty qyzyqty ótkizýge septigin tıgizedi.
