Sýretti túsirgen – avtor
Jyl saıyn qyrkúıektiń shýaqty kúni aımaqtyń aqyn-jazýshylary máre-sáre bolysyp, Oralhan Bókeı atyndaǵy kitaphanada bas qosady. Baıqaýda top jarǵan qalamgerlerge qurmet kórsetedi. Saltanatty jıynnan soń, júldegerler ádettegideı jazýshynyń týǵan jeri Shyńǵystaıǵa saparlaıdy. Bul joly da «Qaıdasyń, Shyńǵystaı?» dep jolǵa shyqqan.
Marapattaý rásimi bastalmas buryn jınalǵan qaýym jazýshy týraly derekti fılmdi tamashalady. Ekrannan 37 jyl buryn dramatýrgııa týraly aıtqan sózin tyńdady. Jazýshy Álibek Qańtarbaev sóz sóılep, dramatýrgııaǵa qalam siltep júrgen jastarǵa rızashylyǵyn bildirdi. Oralhan týraly estelik aıta kele, kelesi jyly Qalıhan Ysqaqtyń 90 jyldyǵyna daıyndalýymyz kerek dep, basshylardyń esine salǵandaı boldy. Basshy demekshi, Oralhan Bókeı atyndaǵy baıqaýǵa jyl saıyn qoldaý kórsetip, joǵary deńgeıde uıymdastyrýǵa tikeleı úles qosyp otyrǵan О́skemen qalasynyń ákimi Jaqsylyq Omar marapattaý rásimine arnaıy keldi.
«Oralhan Bókeı – álemdik ádebıette oıyp turyp oryn alǵan qalamger. Jazýshynyń atynda uıymdastyrylyp jatqan baıqaýǵa qatysqan qalamgerlerdiń barlyǵyna shyn rızashylyǵymdy bildiremin. Al júlde alǵan jazýshy-dramatýrgterdi quttyqtaımyn!» dedi qala basshysy Jaqsylyq Muqashuly.
Estelik, lebizderden soń, marapattaý rásimi bastaldy. О́skemendik jýrnalıst Ádil Áýezhan «Qylburaý» atty eki bólimdi drama-dıalogi, Aıdana Imashpaeva «О́mirimniń nury» dramasy, Abaı atyndaǵy Qazaq ulttyq pedagogıkalyq ýnıversıteti qazaq fılologııasy fakýltetiniń stýdenti Aısulý Ádilbek «Armansyzdyń ah urýy» dramasy úshin О́skemen qalasy ákiminiń Alǵys haty jáne yntalandyrý syılyǵy – 200 000 teńgeniń sertıfıkatymen marapattaldy.
III oryndy oljalaǵan almatylyq Álibek Baıboldyń «Bala. Otbasy. Úsheý» dramasy О́skemen qalasy ákiminiń dıplomy jáne 700 000 teńge sertıfıkatqa ıe boldy. II oryn «Jalǵyzdyq serti» atty drama jazǵan Aızat Raqyshqa buıyrdy. Sonymen qatar 500 000 teńgeniń sertıfıkaty berildi. Al I oryndy Pavlodar qalasynan kelgen Jantas Erkinuly enshiledi. Onyń júlde qory 800 000 teńge. Bas júlde – 1 mıllıon teńge aqtóbelik qalamger Baqyt Jalıevaǵa buıyrdy. «Marıanna» dep drama jazǵan qalamgerge Oralhan Bókeıdiń beınesi bederlengen eskertkish tabys etildi.
«Bas júlde buıyrady dep oılamaǵan edim. Qazylardyń kóńilinen shyǵyp, joǵary baǵa bergenderine alǵysym sheksiz. Shynymdy aıtsam, Oralhan Bókeı atyndaǵy baıqaýǵa Shyńǵystaıǵa barý úshin qatystym», deıdi aqtóbelik jazýshy Baqyt Jalıeva.
Iá, Shyńǵystaıdy ańsap keletinder kóp. Ondaǵysy, Oralhannyń úıine baryp, jazýshy júrgen jerdi bassaq deıdi. Aıtyp ótkenimizdeı, bul joly da bir top qalamger jazýshynyń týǵan kúni qarsańynda aýylyna, Altaıǵa attandy. Shyńǵystaıǵa jeteberistegi Oralhannyń talaı shyǵarmasyna arqaý bolǵan Kúrkireme ózenine toqtap, beti-qoldaryn shaıady. Bas shaıqap otyryp, «Uıqym kelmeıdi», «Saıtan kópir», «Qasqyr ulyǵan túnde» syndy shyǵarmalaryn taldaıdy. Shyńǵystaıǵa kirgende Oralhan álemine engendeı kúı keshedi. Mýzeıin aralap, qalamgerdiń shyǵarmashylyǵymen etene tanysa túsedi. Sóıtip, Shyńǵystaıdan shabytpen qaıtady. Demek úıdi-úıine jete sala qolyna qaıta qalam alary anyq.
Shyǵys Qazaqstan oblysy
