Memlekettik órt baqylaý basqarmasynyń basshysy Konstantın Kanın bul sharalar «Qaýipsizdik úshin – birge», «Kómek qoly» degen ataýǵa ıe ekenin aıta kelip, byltyrǵy jylytý maýsymynda turǵyn úı sektorlarynda 231 órt shyqqanyn, 6 adam kómirtegi totyǵymen, taǵy 5 adam tabıǵı gazben ýlanǵanyn eske saldy.
«Birinshi kezekte muqtaj otbasylar, sondaı-aq qart adamdar jalǵyz turatyn úıler tekseriledi. Bizdiń erekshe baqylaýymyzda kómirmen jylytylatyn 727 jeke úı bar. Bul jumysqa jeke quramnyń 100-den astam adamy jumyldyrylǵan. Úılerdi tekserý qorytyndysyna súıenip, demeýshilik qarajat esebinen kómirtegi totyǵy datchıkterin ornatamyz. Jalpy, 2018 jyldan bastap HÁOT sanatyndaǵy 1,4 myńǵa jýyq otbasy úıi kómirtegi totyǵy datchıkterimen jabdyqtalǵan», dedi K.Kanın.
Maman kómirtegi totyǵymen ýlanýdyń aldyn alý sharalaryna erekshe nazar aýdarylatynyn atap ótti, óıtkeni ony tek sensorlardyń kómegimen anyqtaýǵa bolady.
«Kómirtegi totyǵy tabıǵı gaz tolyq janbaǵan kezde paıda bolady. Onyń túsi de, dámi de, ıisi de joq bolǵandyqtan, tek sensorlar men gaz analızatorlarynyń kómegimen anyqtalady. Quramynda kómirtegi totyǵy bar aýanyń 2-3 tynys alýy ýlanýǵa, odan da aýyr zardaptarǵa ákeledi», deıdi Memlekettik órt baqylaý basqarmasynyń basshysy.
Mamandar baspasóz jıynynda kómirtegi totyǵymen ýlanýdyń aldyn alýǵa qatysty aqyl-keńesterin berdi.
15 tamyzdan beri qalada halyqtyń áleýmettik osal toptaryna baǵyttalǵan «Qaýipsizdik úshin – birge», «Kómek qoly» aksııalary jalǵasyn taýyp, 152 911 jeke turǵyn úı esepke alyndy, onyń ishinde qatty otynmen jylytylatyn 727 jeke úı erekshe baqylaýda tur. Turǵyn úı uıymdarynyń (MIB, PIK, t.b.) ókilderimen birlesip jınalystar ótkiziledi, jylytý peshterin paıdalaný kezinde órt qaýipsizdigi erejeleriniń saqtalýy týraly SMS habar taratylady.
Degenmen TJD turǵyn úı sektorynda memlekettik órt baqylaý qyzmeti júzege asyrylmaıtynyn, órt qaýipsizdigine azamattar ony sanaly túrde saqtaǵan jaǵdaıda ǵana qol jetkizetinin qaperge saldy.
«Kómirtegi totyǵy – únsiz jan alǵysh, ol ıissiz, tússiz, sondyqtan ony tek datchıkter men dabyldardyń, gazdy baqylaý quraldarynyń kómegimen anyqtaýǵa bolady. Kómirtegi totyǵymen ýlaný kóbinese tútin tartatyn murjalardyń, jel aıdaıtyn kanaldardyń bolmaýy, baılanystyrýshy qubyrlardyń tyǵyzdalmaýy, gaz aspaptaryn paıdalaný kezinde terezelerdiń jabyq bolýynan oryn alyp jatady», deıdi mekeme mamandary.
ALMATY
