Foto: senate.parlam.kz
Platformany paıdalanýshylardyń kóbeıip bara jatqanyn jáne onyń ishinde jasóspirimderdiń kóptigin aıtqan depýtat atalǵan platforma mazmunynyń teris áserine alańdaýshylyq bildirip, másele kóterdi.
Senatordyń aıtýynsha, keıbir paıdalanýshylar TikTok-ty jaqsy maqsatta paıdalanyp jatsa da, bul shólge tamǵan tamshydaı. Bilim deńgeıin arttyrý, tarıhty zerdeleý, t.b. dáıekti taqyryptarǵa qyzyǵýshylyq tanytatyndar óte az.
Depýtattyń pikirinshe, balalardyń psıhıkasy men jalpy densaýlyǵyna teris áser etetin, sondaı-aq kıberqaýipsizdik pen derekterdiń qupııalylyǵyna qaýip tóndiretin beınekórinister platformada keńinen taralyp jatyr. Fransııa, Kanada, Qyrǵyzstan sııaqty kóptegen elder TikTok-ty paıdalanýdy shekteý jóninde sharalar qabyldaǵan.
Gennadıı Shıpovskıh balalardy qorǵaý jáne ulttyq qaýipsizdikti nyǵaıtý maqsatynda birqatar usynys tastady.
«TikTok platformasy ekstremızmdi, radıkalızmdi, separatızmdi, shekten tys qaýipti jáne moraldyq qundylyqtarǵa qaıshy kontentterdi anyqtaý jáne shekteý boıynsha naqty algorıtmdi usynýy kerek. Sondaı-aq TikTok platformasy jas balalardy onlaın qaýipti kontentten qorǵaý maqsatynda YouTube Kids sekildi balalarǵa arnalǵan arnaıy jeli usynýy tıis. 13 jasqa tolmaǵan balalardyń TikTok-qa ata-anasynyń telefonynan kirgen jaǵdaıda FaceID tehnologııasy arqyly buǵattaý mehanızmin qarastyrý kerek. Olaı bolmaǵan jaǵdaıda elimizde TikTok platformasyn buǵattaýdy suraımyz. Bul máselelerdiń sheshimin tabý el azamattarynyń densaýlyǵyn jáne moraldyq qundylyqtaryn saqtap qalýǵa, sondaı-aq jastar arasynda taralyp jatqan qaýipti ádetterdi azaıtýǵa baǵyttalǵan qadam bolmaq», dedi senator Gennadıı Shıpovskıh.
