Shaǵyn aýdandaǵy jańa emdeý mekemesi kúnine 100-den astam adamǵa dárigerlik kómek kórsetedi. Munyń syrtynda túrli naýqastarǵa jeńil-jelpi operasııa da jasaı beredi. Munda operasııa zamanaýı ýltradybysty, lazerli qurylǵylarmen júrgiziledi. Kópsalaly klınıkanyń jatyp emdeletin naýqastarǵa arnalǵan 35 tósektik orny bar. Sondaı-aq dıagnostıkalyq bólimshesi de jumys istep tur.
«Operasııa jasaıtyn eki arnaıy bólmemiz bar. Jyl aıaǵyna deıin 2 myńǵa jýyq operasııa jasaımyz dep josparlap otyrmyz. Medısınalyq saqtandyrý qorymen kelisimshart aıasynda turǵyndardy tegin qabyldaıtyn bolamyz. Kerekti qurylǵylardyń bári, tıisti lısenzııalar bar. Dáriger mamandar da jetkilikti. О́zim hırýrgpin. Men operasııa jasaýmen qosa, qalqansha bezin emdeımin. Biz memleket-jekemenshik áriptestigi aıasynda jumys isteımiz. Qazir klınıkalardyń kóbi kommersııalyq negizde aqyly qyzmet kórsetedi. Al biz mindetti medısınalyq saqtandyrý qorymen tyǵyz baılanys ornatyp, naýqastarǵa tegin qyzmet kórsetýge daıynbyz», deıdi medısınalyq ortalyqtyń bas dárigeri Vıktor Gavrılov.
Medısınalyq ortalyqtyń ashylý saltanatyna aımaq basshysy Qumar Aqsaqalov pen qala ákimi Marat Júndibaev qatysty.
«Áýejaı» shaǵyn aýdanynda ashylǵan jańa medısınalyq ortalyq eń aldymen, osy mańaıda turyp jatqan turǵyndarǵa yńǵaıly bolmaq. Biz «Iýbıleınyı», «Bereke» shaǵyn aýdandaryndaǵy emhanalardy qosa alǵanda, jańa nysandar salýdy jalǵastyramyz. Aldaǵy ýaqytta mundaı medısınalyq mekemeler sany kóbeıedi. Mundaı ortalyqtardyń jıi ashylyp jatqany – jaqsy úrdis. Bul – halyq densaýlyǵyn nyǵaıtýdyń birden-bir kepili. Qazir aýyl medısınasyn órkendetýge de erekshe kóńil bólinip otyr. Bıyldyń ózinde oblys kóleminde 25 densaýlyq saqtaý mekemesiniń qurylysy aıaqtalady», dedi oblys ákimi.
Turǵyndarǵa qolaıly jaǵdaı jasaý maqsatynda jańa medısınalyq ortalyqtyń janynan №2 qalalyq emhananyń fılıalyn ashý josparlanyp otyr.
Medısınalyq mekeme kópqabatty turǵyn úıdiń astyńǵy qabatyna ornalasqan. Saltanatty rásimde qala ákimi osy mańaıdaǵy úılerdi turǵyzǵan «KBS» qurylys kompanııasynyń aldaǵy ýaqytta dál osy shaǵyn aýdannyń aýmaǵynan úlken emhana salýdy josparlap otyrǵanyn aıtty.
«Árıne, medısınalyq kómek únemi kerek. Ol jaqyn ári jaıly bolsa tipten tıimdi. Osy mańaıda №2 mektep te salynyp jatyr. Balabaqsha, saýda oryndary da boı kóteredi. Turǵyndardyń qatary jyl ótken saıyn ósip jatyr. Sondyqtan áleýmettik nysandardyń barlyǵy da halyqqa qajet. Ashylǵan ortalyq tek emdeý júrgizip qana qoımaıdy, qan saraptamasyn alatyn jeke zerthana da bolady», dedi qala ákimi Marat Júndibaev.
Qostanaı oblysy
