Glen: «Hattyń 100 jyl boıy saqtalyp, maǵan jetkenine tańym bar», deıdi. Al Ulybrıtanııa Koroldik poshtasy hat orta jolda joǵalyp ketken bolýy múmkin degen boljam aıtady. Brıtandyq poshta qyzmeti týraly zańǵa sáıkes, basqa adamǵa jiberilgen hat-habarlardy ashyp oqý qylmysqa jatady. Alaıda Glen hat 100 jyl buryn jiberilgendikten, ony ashýǵa bolady dep sheshken. «Eger bul qylmys bolsa, men tek keshirim suraı alamyn», deıdi ol. «Qymbatty Ketı» dep bastalatyn hatty Osvald Marsh degen azamat jaryna joldaǵan eken. «Bul hattyń dál maǵan jetkeni qyzyq, árıne. Eger, ol adamnyń týystary, urpaǵy bar bolsa, hatty menen alýyna bolady», deıdi Glen.
«Jumysqa kelmeıtin depýtat»
Iosıkadzý Hıgasıtanı 2022 jyly Japonııanyń Senat depýtaty bolyp saılanǵan. Alaıda ol joǵary laýazymǵa ıe bolǵan kúnnen bastap birde-bir ret Parlament otyrysyna qatyspaǵan.
«Jumysqa kelmeıtin depýtat» degen laqap atqa ıe bolǵan azamat Birikken Arab Ámirlikterinde turady. Sondaı-aq ol YouTube jelisinde GaaSyy degen atpen tanymal. Bloger jumysqa kelýdiń ornyna jelide júrgen-turǵanyn salyp, ózge áriptesteriniń ashýyna tıgen. Ol birneshe márte eskertý alsa da, qulaǵyna ilmese kerek. Sodan keıin senat depýtattary biraýyzdan onyń ókilettigin toqtatýǵa daýys bergen. Iosıkadzý Hıgasıtanı – Japonııadaǵy keıingi 70 jylda mandatynan aıyrylǵan jalǵyz depýtat.
Mask Marsqa jiberedi
SpaceX kompanııasynyń negizin qalaýshy Ilon Mask aldaǵy eki jylda Marsqa bes ushqyshsyz mıssııany jiberýdi josparlap otyrǵanyn málimdedi.
Onyń aıtýynsha, eger osy bes keme sátti qonsa, adamdardyń Marsqa barýyna jol ashylady. Al qıyndyq týyp jatsa jospar taǵy eki jylǵa keıinge shegeriledi. О́ıtkeni kemelerdi jerden qyzyl ǵalamsharǵa tek 2 jylda bir ret jiberýge bolady. Kásipker qandaı qıyndyqqa tap bolsa da, Marsqa ushý jıiligin arttyrýdy josparlap otyrǵanyn aıtty. «Biz kez kelgen adamǵa ǵaryshqa saıahattaý múmkindigin bergimiz keledi», – dep jazdy Ilon Mask óziniń tvıtter paraqshasynda.
