Sýret: senate.parlam.kz
Senat tóraǵasy elimizde ótken AES salý máselesine qatysty respýblıkalyq referendýmnyń qorytyndysyna toqtalyp ótti. M.Áshimbaev referendýmǵa otandastarymyzdyń belsendi qatysqanyn alǵa tartyp, bul azamattardyń Memleket basshysynyń Ádiletti Qazaqstan qalyptastyrý jolyndaǵy barlyq bastamasyn qoldaıtynyn taǵy da bir kórsetip bergenin aıtty. Sondaı-aq ol el Prezıdentiniń referendým ótkizý týraly sheshimi memlekettiń bolashaǵy úshin asa mańyzdy qadam ekenine nazar aýdardy.
Sonymen qatar bıýro otyrysynda 8-9 qazan kúnderi Astanada ótetin Álemdik jáne dástúrli dinder lıderleri Sezi Hatshylyǵynyń XXII otyrysy men I Jas dinı lıderlerdiń forýmyna daıyndyq barysy pysyqtaldy. Atalǵan is-sharalarǵa 19 elden kelgen 30 delegasııa ókilderi qatysady.
Bıýro músheleri osy aptada ótetin Palata otyrysynyń da kún tártibin talqylady. О́tken aptada Memleket basshysynyń Jarlyǵymen Marat Qojaev Senat depýtaty bolyp taǵaıyndalǵan edi. Osyǵan baılanysty jalpy otyrysta ant berý, turaqty komıtetke múshe etip saılaý sııaqty uıymdastyrý máseleleri qaralady.
Buǵan qosa Senat otyrysynyń kún tártibine «Qazaqstan Respýblıkasynyń Úkimeti men Qatar Memleketiniń Úkimeti arasyndaǵy basym salalardaǵy jobalardy damytý úshin uzaqmerzimdi strategııalyq áriptestik ornatý týraly kelisimdi ratıfıkasııalaý týraly» zań shyǵaryldy.
Atalǵan zań normalary eki eldiń telekommýnıkasııa, energetıka, munaı-hımııa jáne basqa da salalardaǵy birlesken jobalaryn iske asyrýǵa, sondaı-aq saýda-ekonomıkalyq yntymaqtastyqty nyǵaıtýǵa arnalǵan.
Sonymen qatar bıýro otyrysynda Májilisten kelip túsken zańdar jumys úshin turaqty komıtetterge bólinip berildi.
