Foto:gov.kz
Nátıjesinde, sý resýrstaryn zańsyz jáne tıimsiz paıdalaný, memlekettik satyp alýǵa baılanysty zań buzýshylyqtar anyqtalǵan.
Almaty oblysynyń Kúrti aýdanynda sharýa qojalyqtarynyń sýarmaly sýdy jergilikti «Qazsýshar» fılıalymen kelisimshartqa otyrmaı paıdalanǵandary anyqtalǵan. Atap aıtqanda, 100 ga egis alqabyn sýarý úshin sýdy zańsyz alǵan.
Sondaı-aq keıbir gıdrotehnıkalyq qurylystardyń tozýyna baılanysty kanalda qosymsha sý shyǵyny beligili bolǵan. Iаǵnı fılıal basshylyǵynyń nysandardyń tehnıkalyq jaı-kúıine jetkiliksiz baqylaý júrgizýine baılanysty sý resýrstaryn tıimsiz paıdalaný jáne esebin júrgizý oqıǵalary tirkelgen.
Budan bólek, memlekettik satyp alýda zań buzý faktileri de anyqtalǵan. Fılıal zańdy jáne ishki normatıvtik qujattardy buza otyryp, bir kózden memlekettik satyp alý týraly 7 kelisimshart jasasqan. Osyǵan deıin, 2023 jylǵy shildede jalpy somasy 17,5 mln teńgege Sol jaǵalaý magıstraldy kanalynyń jer bóligin mehanıkalyq tazalaý qyzmetin kórsetýge osyndaı tásilmen shart jasalǵan. Demek zań buzýshylyq júıeli túrde qaıtalanǵan.
Sonymen qatar fılıal dırektorynyń mindetin atqarýshy jaqyn týystarymen birge jumys isteýge jol bermeý týraly sybaılas jemqorlyqqa qarsy zańnamada belgilengen talapty saqtamaǵan.
Tekseris qorytyndysy boıynsha anyqtalǵan quqyq buzýshylyqtardyń jalpy somasy shamamen 20 mln teńgeni quraǵan.
«Anyqtalǵan zań buzýshylyqtar boıynsha materıaldar tıisti ýákiletti organdarǵa jiberildi. 3 quqyq buzýshylyq faktisi boıynsha fılıal dırektorynyń mindetin atqarýshy tulǵaǵa ákimshilik aıyppul salyndy. Aıta ketý kerek, dırektordyń m.a. osyǵan deıin de birneshe márte eskertý túrinde tártiptik jaýapkershilikke tartylǵan», delingen habarlamada.
Oblystyq fılıalǵa kemshilikterdi joıý boıynsha usynystar berilgen.
Sonymen qatar «Qazsýshardyń» basqa da oblystardaǵy fılıaldary tekseristen ótedi. Aıta keteıik, sýdyń «kóleńkeli» naryǵymen tıimdi kúresý úshin mınıstrlik janynan sý resýrstaryn retteý, qorǵaý jáne paıdalaný jóninde jańa Komıtet qurylǵan.
Eske sala keteıik, osyǵan deıin Joǵary aýdıtorlyq palata men Sý resýrstary jáne ırrıgasııa mınıstrligi birlesip júrgizgen tekseristerdiń qorytyndysy boıynsha «Qazsýshar» kásiporynynyń basshy laýazymyndaǵy 5 qyzmetkeri tártiptik jaýapkershilikke tartylǵan edi. Al Sý resýrstary jáne ırrıgasııa mınıstrliginiń Ishki aýdıt departamenti Jambyl oblysynda sýdy zańsyz paıdalanýdyń 10 faktisin anyqtaǵan. Búgingi tańda fılıal basshysy qyzmetinen bosatylǵan.
