Ulttyq statıstıka bıýrosy bıyl sáýir aıyndaǵy esebinde Eńbek jáne halyqty áleýmettik qorǵaý mınıstrliginiń jumyspen qamtý organdaryna 315,6 myń otandasymyz jumyssyz retinde resmı tirkelgenin málimdedi. Al jalpy eńbek etýge qulyqsyz azamattar qatary 450 myńǵa jetkenin jazdy. Kórsetkishti aımaqtarǵa jiktesek, kósh basynda Almaty, Túrkistan, Mańǵystaý oblysy men Astana qalasy tur. Túıtkildi máseleniń ýshyǵýyna áser etýshi negizgi faktor qatarynda ónerkásiptiń árkelki damýy, aýyldyq jerlerdegi jumys oryndarynyń tapshylyǵy, ýrbanızasııa bar.
Áıtse de, memleket el ekonomıkasynyń aıaǵyna tusaý bolyp otyrǵan ótkir máseleni júıeli sheshýge kirisken. Onyń biri – «Joltap» áleýmettik jobasy. Astanada bul bastama jańa mamandyqtardy tegin ıgerip, óz isin ashýǵa, turaqty jumys tabýǵa, 52 memlekettik qoldaý sharalary boıynsha keńes alýǵa múmkindik beredi.
Igi joba aıasynda eńbekke aralasqan Aıbat Mutalov alǵashynda mamandardan «Barshaǵa múmkindik» modýldik pýnktinde keńes alǵanyn aıtty. Keıin óziniń «dánekerleý» mamandyǵyn jetildirip, jyl basynda jeke kásibin bastaǵan.
– Keńsede maǵan gazben dánekerleýshi kýrsynyń oqý úderisi túsindirildi. Oqytý oflaın formatta eki aptaǵa sozyldy. Jumys kúnderi eki saǵattan tek teorııany ǵana emes, sonymen qatar tájirıbe de úırendik. Is júzinde bizge árdaıym keńes suraı alatyn tálimger berildi. Olar sabaqta qosylystyń qalaı dánekerlenetinin, ottyqty qandaı buryshpen, qandaı jyldamdyqpen júrgizý kerektigin kórsetti. Nátıjesinde, mamandandyrylǵan oqýdan ótip, jeke kásipti damytýǵa kúsh saldym. Bıznesti ashpas buryn ishteı qatty ýaıymdadym. Bastapqyda kásiporynnan órt sóndirý gıdranttary men bolat tisterge stendter jasaý qyzmetterin aldyq. О́z isińdi júrgizýde tájirıbeń bolmasa qıyn eken. Máselen, keı qyzmetker kútpegen jerden jumystan ketip, olardy almastyratyn maman tappaı tosyldym. Biraq másele ońtaıly sheshildi. Bolashaqta joba aıasynda SMM, esepshi kýrstaryn da meńgerýdi josparlap otyrmyn, – dedi jas kásipker.
Qazir Astana qalasynda jumyssyzdyq deńgeıi 4,5%-dy qurap otyr. Sondyqtan bul jobaǵa 18-50 jas aralyǵyndaǵy kez kelgen elordalyq turǵyn qatysa alady. Búginde 21 myń azamat memlekettik qoldaý sharasy men qalanyń ózekti jumys oryndary týraly keńes alyp, 16 jumysshy jáne sıfrlyq daǵdy jóninen qysqamerzimdi oqýdan ótken.
Jaýaptylar áleýmettik bastamany odan ári jetildirip, arnaıy «Jumystap.kz» platformasyn jasaqtady. Bastama alǵash tamyz aıynda Astana qalasynyń ákimi Jeńis Qasymbektiń «Joltap» túlekterimen kezdesýinde iske qosyldy.
– Saıtqa tek Astana qalasynyń azamattary men bıznes ókilderi ǵana emes, tipti Almaty, Temirtaý, Semeı sııaqty aımaqtardan jumys berýshiler de qosylyp jatyr. Platformaǵa telefon nómirin jazý arqyly ǵana tirkelýge bolady. Qazirgi ýaqytta saıtta 7 myń adam tirkelgen. Iаǵnı árbir tórtinshi adam tirkelýden ótedi degen sóz. Bul – otandyq startap úshin óte jaqsy nátıje. Osynsha qoldanýshynyń ishinde 1 myńy kásiporyn bolsa, 6 myńy – jumys izdeýshi. Jumys berýshilerdiń ishinde iri ári jelilik kásiporyndar da bar. Saıtta jumys boıynsha 1 100 habarlama jarııalandy. Alaıda bul – osynshama jumys orny bar degen sóz emes. Keı kezde bir habarlamanyń artynda 20, tipti 200 adamǵa tapshylyq turady. Iаǵnı bos jumys orny sany – osy 1 100 habarlamadan kóp degen sóz. Qoǵamdyq tamaqtaný, qyzmet kórsetý, saýda salalarynda qyzmetker tapshylyǵy bar. Onda jumys berýshiler keminde 200-den asa habarlama qaldyrǵan, – dedi «Joltap» jobasynyń saraptama bóliminiń menedjeri Erasyl Dildáım.
Onyń aıtýynsha, kóbine qoldanýshylar keńsedegi jumysqa, sıfrlyq tapsyrmalar men saýda salalaryna qyzyǵýshylyq bildiredi eken.
– Otandastarymyz satýshy-kassır, barısta, grafıkalyq dızaın, satý menedjeri, targetolog, tiginshi, SMM, esepshi, júrgizýshi, merchendaızer, kúzetshi, júk tasymaldaýshy sııaqty mamandyqtarǵa úndeý qaldyryp júr. Saıttyń negizgi maqsaty – jumys berýshiler men úmitkerlerdi bir-birimen tez arada baılanystyrý. Osynyń bári adamdardyń yńǵaılyǵy úshin Whatsapp messendjeri arqyly júzege asyrylady, – dedi ol.
Servıstik platforma elimizdiń barlyq azamatyna tegin túrde qoljetimdi. Negizgi qoldanýshylar qatarynda turaqty jumys izdeýshi men úıden jumys isteýdi qalaıtyn azamattar bar. Buǵan qosa ýaqytsha tapsyrys oryndaýshyny izdeıtin kásipkerler de kezdesetin kórinedi.
– Bul platformanyń basqa da jumys izdeýge múmkindik beretin saıttardan aıyrmashylyǵy bar. Birinshiden, 6 myń jumys izdeýshiniń jartysy – «Joltap» jobasynyń túlekteri. Iаǵnı jumysqa daıyn 3 myń úmitker bar degen sóz. Ekinshiden, tek turaqty jumystan bólek, kishigirim tapsyrysty oryndaıtyn maman ıelerin tabýǵa bolady. Aıtpaqshy, tapsyrys aýmaǵy shektelmegen. Basqa elden tapsyrystar da qabyldanady. Úshinshiden, siz jumysty nemese qyzmetkerdi deldalsyz jáne tólemsiz taba alasyz. Memleket basshysy Qasym-Jomart Toqaev Qazaqstan halqyna arnaǵan Joldaýynda 2025 jyldy «Jumysshy mamandyqtary jyly» dep jarııalady. Osyǵan baılanysty «Jumystap.kz» saıty halyq arasynda jumysshy mamandyqtaryn ilgeriletýge, eńbek qundylyqtaryn keńinen nasıhattaýǵa, jumyssyzdyq deńgeıin azaıtýǵa óz úlesin qosady degen senimdemiz, – dedi E.Dildáım.
Jańadan qurylǵan saıtta kún saıyn qoldanýshylar pikiri eskerilip, onyń jumysy sıfrlyq tehnologııalar esebinen jetildirilip keledi. Eger keıbir jumys izdeýge múmkindik beretin platformalarda alaıaqtar kezigetin bolsa, bul saıtta mundaı habarlamalarǵa jol berilmeıdi. Muny jaýaptylar jiti qadaǵalap otyrady.
