Aqtóbe oblysynyń qylmystyq ister jónindegi mamandandyrylǵan aýdanaralyq sotynda avtomobıldi basqaratyn adamnyń jol júrisi nemese kólik quraldaryn paıdalaný qaǵıdalaryn abaısyzda eki nemese odan da kóp adamnyń ólimine ákep soqqan degen aıyppen aıyptalǵan T.-ǵa qatysty úkim jarııalandy (QK-niń 345-babynyń 4-bóligi).
«2024 jylǵy 05 maýsymda saǵat 15.15 shamasynda, «Toyota Alphard» avtokóligin Aqtóbe oblysy Qarǵaly aýdany aýmaǵynda Aqtóbe qalasy baǵytynan Qarǵaly aýdany Álimbet aýyly baǵytynda «Aqtóbe-Orsk» tas jolymen basqaryp kele jatyp, tas joldyń 93-shaqyrymynda, Qazaqstan Respýblıkasynyń Jol júrisi Qaǵıdalarynyń talaptaryn óreskel buzyp, rýldik basqarý júıesine ıe bola almaı aýdarylyp, nátıjesinde avtokólik salonyndaǵy tórt jolaýshynyń abaısyzda ólimine ákelip soqtyrǵan, sonymen qatar bir jolaýshynyń densaýlyǵyna zııan keltirgen», delingen sottyń habarlamasynda.
Sottalýshy ózine taǵylǵan aıyp boıynsha kinásin tolyq moıyndap, aldyndaǵy kólikpen soqtyǵysýdan jáne joldaǵy shuńqyrdan qashyp rýldi qatty buryp aýdarylyp qalǵanyn kórsetti.
Al memlekettik aıyptaýshy taǵylǵan aıypty tolyq qoldap, sottan T.-ny 7 jyl merzimge kólik quralyn basqarý quqyǵynan aıyra otyryp, 5 jyl merzimge bas bostandyǵynan aıyrý jazasyn taǵaıyndaýdy surady.
«QK-niń 345-babynyń 4-bóliginiń sanksııasynda belgili bir laýazymdardy atqarý nemese belgili bir qyzmetpen aınalysý quqyǵynan jeti jylǵa deıingi merzimge aıyra otyryp, bes jyldan on jylǵa deıingi merzimge bas bostandyǵynan aıyrý jazasy kózdelgen. Jaza taǵaıyndaý barysynda qylmystyq jaýaptylyq pen jazany jeńildetetin mán-jaı retinde sottalýshynyń jas balalarynyń bolýyn, buryn qylmystyq jaýaptylyqqa tartylmaǵanyn, kinásin moıyndap, shyn nıetpen ókinýin tanydy. Sotpen qylmystyq jaýaptylyq pen jazany aýyrlatatyn mán-jaı anyqtalǵan joq», delingen habarlamada.
Sot, T.-ny KK-niń 345-babynyń 4-bóligimen men kináli dep tanyp, 7 jyl merzimge kólik quralyn basqarý quqyǵynan aıyra otyryp, 5 jyl merzimge bas bostandyǵynan aıyrý jazasyn taǵaıyndady.
