(Sýretti Berel-qoryq mýzeıiniń baspasóz qyzmeti usyndy)
Kóne qońyr taraqtyń bálendeı bezendirilgen oıý-órnegi, tańba, belgisi joq. Áıel adamnyń tutynǵan turmystyq zaty ekeni túsinikti. Jalpy, qazba jumysy nátıjesinde qarý-jaraqtan bólek áıel zatyna tıesili kóptegen jádiger shyqqan. Búgingi kúnge deıin júzderi kertilmeı, súıek taraqtyń qaz qalpynda saqtalǵany qaıran qaldyrady. Jádigerge zer salsaq, tisteri uzynsha, 4-5 santımetr. Taraqtyń jalpy uzyndyǵy – 9,5 santımetr bolsa, eni – 7 santımetr. Pishini trapesııa tárizdi, ústińgi jaǵynda tesigi bar. Tisteriniń sany – 15 dana.
Súıek buıym 2016 jyly belgili arheolog Zeınolla Samashevtiń jetekshiligimen júrgizilgen qazba jumystarynyń nátıjesinde Berel jazyǵynan tabylǵan. Qundy jádiger búgingi tańda Berel qoryq mýzeıiniń qorynda tur. Kelimdi-ketimdi saıahatshylar mýzeıden kóne taraqtan basqa da qundy jádigerlerdi kózben kóre alady.
Shyǵys Qazaqstan oblysy,
Berel aýyly
