Jaqynda «Dárilik zattar hımııasy» halyqaralyq qoǵamy Italııanyń Neapol qalasynda Halyqaralyq HHV ǵylymı konferensııa uıymdastyrdy. Oǵan álemniń 17 elinen 125 ǵalym qatysty. Sol keleli keńes barysynda Halyqaralyq qoǵam prezıdenttigine usynylǵan akademık Serǵazy Myńjasarulynyń kandıdatýrasy biraýyzdan qoldaý tapty. Bul – elimizdiń dári óndirisi men farmakologııa salasyndaǵy áleýetke, qabiletke kórsetilgen zor qurmet.
Qoǵamnyń jańa prezıdenti Neapol konferensııasynda elimizdegi endemıkalyq ósimdikterinen alynatyn biregeı dárilik preparattar jóninde aǵylshyn tilinde baıandamasyn sátti jasady. Sonyń nátıjesinde, quramynda Djıovannı Appendıno (Italııa), Djeron Dıkshat (Germanııa), Pavel Drashar (Chehııa), Iаsek Morjıskı (Polsha), Orazıo Taglıatela-Skafatı (Italııa), Ikýro Abe (Japonııa), Dın Gýo (Qytaı), Mıroslav Strnad (Chehııa), Agneshka Voıtkılevıch (Polsha) sekildi esimi álemge áıgili ǵalymdar bar Halyqaralyq qoǵamnyń atqarýshy organy elimiz ósimdikteriniń dárilik qasıetine zor mán berip, bizdegi dári-dármek óndirisine zor qyzyǵýshylyq tanytyp otyr. Bul da otandyq dári-dármek óndirisine úlken olja.
Ispanııanyń Kadıs ýnıversıtetiniń professory Antonıo Sala Peralta elimiz ósimdikterinen alynatyn parazıtterge qarsy qospalar belsendiligine erekshe mán bergen eken. Italııanyń Jańa tehnologııalar, energetıka, turaqty ekonomıkalyq damý jónindegi ulttyq agenttiginiń doktory Fransesko Penara elimizde ósetin kók saǵyz ósimdiginiń qasıetine qyzyǵýshylyq tanytty. Qytaılyq professor Ren Tan (Nankın ýnıversıteti) otandyq endemıkalyq ósimdikterden alynǵan neıroprotektorlyq alkaloıdtarǵa baılanysty birigip jumys jasaýdy usyndy. Majarstandaǵy Seged ýnıversıtetiniń professory Jolt Sakonı qaterli isikke qarsy belsendiligi bar sýbstansııalardy jasaýǵa elimizdiń endemıkalyq ósimdikterinen alynatyn dárilik zattar negizinde stereoselektıvti sıntezder júrgizý jónindegi oıymen bólisti. Fransııanyń Shampan-Ardenn Reıms ýnıversıtetiniń professory Georgs Massıot otandyq «Arglabın» preparatyn Eýropa naryǵyna shyǵarýǵa usynys bildirdi.
Osynshama san salaly mán-mańyzy, tıimdiligimen erekshelengen Halyqaralyq konferensııa barysynda akademık Serǵazy Ádekenov Italııanyń INDENA farmasevtıkalyq kompanııasynyń ókilderi Lýka Pagnı, Lýka Senaldı, Pıetro Allergını myrzalarmen elimizdegi shıkizattan jasalatyn fıtopreparattardyń birlesken óndirisin uıymdastyrý jóninde kelissóz júrgizdi. Bul kelisim de shıkizat óndirisiniń órisin keńeıtedi.
Osylaısha, jahan qyzyǵyp otyrǵan Arqanyń qyzyl jýsany men E.Bóketovtiń tól shákirti, akademık Serǵazy Myńjasaruly álemdik deńgeıde moıyndaldy. Sonyń arqasynda dárilik zattar hımııasynyń Halyqaralyq qoǵamy Arqaǵa qonys aýdaryp jatyr. Aldaǵy ýaqytta farmasevtıka damýdyń jańa deńgeıine kóterilip, tyń jobalardyń tynysy ashylady. Eldegi dári óndirisi mol ıgilikke kenelip, qomaqty ınvestısııaǵa qol jetkizetin bolady. Buǵan qoǵamnyń jańa prezıdenti de nyq senimdi.
– Bul – meniń ǵana abyroıym emes, elimizdiń farmasevtıkalyq óndirisiniń bedeli. Halyqaralyq deńgeıdegi mártebeli uıymnyń tizginin ustaý maǵan da, elimizge de «jiliktiń maıly basyndaı» mansap qana emes. Ol – elimizdiń dári óndirisi salasynyń tehnologııalyq jańǵyrýy, ınvestısııalyq múmkindik. Iаǵnı otandyq dári óndirisiniń áleýeti burynǵydan da arta túsedi. Sol oraıda farmasevtermen birlese, bar kúshimizdi jumsap, eńbek etemiz, – dedi akademık Serǵazy Myńjasaruly.
Qaraǵandy oblysy
