Kollajdy jasaǵan – Záýresh Smaǵul, «EQ»
Jyl sońyna qaraı bank 124,5 mlrd teńge shyǵyndy tirkedi. Buǵan klıentterdiń jylystaýy men reseılik aksıonerge nesıeni qaıtarý sebep bolǵany sol kezde ashyq aıtyldy. Osydan keıin holdıng bank depozıtine óz qarajatyn da, enshiles kompanııalardyń salymdaryn da ornalastyrdy. 2023 jyldyń jazynda bank «Fitch Ratings» reıtıngin aldy. Jergilikti jáne sheteldik banktermen korrespondenttik shottar jańartylyp, SWIFT arqyly valıýtalyq aýdarym qalpyna keltirildi. Qazanǵa qaraı «Bereke Bank» VISA tólem júıesimen jumysyn qaıta bastady.
2023 jyldy bank 29 mlrd teńge taza paıdamen, 2,1 trln teńge aktıvpen, 1,9 trln teńge mindettememen aıaqtady.
«Lesha Bank»-pen mámile jasamas buryn holdıng kóptegen usynysty qarastyrdy. Bul rette úlesti de, bank aksııalarynyń tolyq paketin de satý máselesi talqylandy. Biraq «Lesha Bank» usynysy anaǵurlym tartymdy boldy, óıtkeni onyń ishinde usynylǵan satyp alý baǵasy, mámileni jabý merzimi, bank aksııalarynyń barlyq paketin satyp alý nıeti bar edi.
«Báıterek» holdınginiń habarlaýynsha, bank klıentter aldyndaǵy barlyq mindettemesin oryndaýdy jalǵastyrady. Qarjy naryǵyn retteý jáne damytý agenttigi (QNRDA) málimetinshe, aksıonerdiń aýysýy bankke damý perspektıvalaryn ashyp, halyqaralyq standarttardy engizýge, ónim jelisin keńeıtýge, klıentterge qyzmet kórsetý sapasyn arttyrýǵa múmkindik beredi.
«Bul bank pozısııasyn nyǵaıtýǵa, qarjylyq turaqtylyqty arttyrýǵa, sondaı-aq klıentterge ınnovasııalyq ári básekege qabiletti sheshimderdi usynýǵa yqpal etedi. Sheteldik ınvestordyń otandyq qarjy naryǵyna kelýi ekinshi deńgeıli bankter arasyndaǵy básekelestikti arttyryp, naqty sektordy nesıelendirýdiń ósýin qamtamasyz etedi», dep málimdedi QNRDA.
«Bereke Bank» aktıv kólemi jóninen – 9-orynda, nesıe portfeliniń kólemi jóninen – 7-orynda. Bank aktıvteri – 2 338 mlrd teńge, menshikti kapıtaly – 186 mlrd teńge. «Lesha Bank» Qatarda tańdaýly tórt banktiń qataryna kiredi. Banktiń ıslamdyq qarjylandyrýdaǵy korporatıvtik áleýmettik bastamalary, sıfrlyq sheshimderi men usynystary da erekshe tanymal. 2024 jylǵy 1 shildedegi jaǵdaı boıynsha qarjy ınstıtýtynyń aktıvteri – 2,05 mlrd dollar, menshikti kapıtaly – 0,35 mlrd dollar, kapıtaldyń jetkiliktilik koeffısıenti – 16,9%. 2023 jyldyń qorytyndysynda – 26,5 mln dollar, 2024 jyldyń 6 aıynda 15,5 mln dollar taza paıda tapty.
Sarapshylardyń aıtýynsha, Qatar ınvestorlarynyń qoldaýymen bank aıtarlyqtaı ósim kórsetýge tıis. «Lesha Bank» – «Qatar Financial Center» qor bırjasynda tirkelgen jarııa kompanııa. Banktiń iri quryltaıshylarynyń biri –Qatar ámiriniń ákesi sheıh Hamad bın Halıfa Ál Tanı. Sheıh Hamad óziniń ınvestısııalyq bastamalarymen, el ekonomıkasyn ártaraptandyrý strategııasymen tanymal. Bul saıasat álemge áıgili QIA ınvestısııalyq qoryn qurýǵa yqpal etti. Banktiń dırektorlar keńesin sheıh Feısal bın Tanı Ál Tanı basqarady. Sheıh Feısal Qatar ınvestısııalyq qory – «Qatar Investment Authority» (QIA) kompanııasyndaǵy basty tulǵalardyń biri.
Qatarlyqtar úshin bizdiń banktiń aktıvterin satyp alý – Qazaqstan men Ortalyq Azııanyń bank naryǵyna kirý múmkindigi ǵana emes, sonymen qatar elimizde josparlanyp otyrǵan mıllıardtaǵan ınvestısııaǵa baılanysty qarjy aǵyndaryn baqylaý tetigi. Sarapshylar «Lesha Bank» pen basqa da qatarlyq ınvestorlardy tartý óte mańyzdy oqıǵa ekenin aıtady. Geosaıası jaǵdaılar qubylyp turǵan kezde osyndaı senimdi seriktesti tartý bizge álemdik arenada jańa múmkindikterge jol ashyp, ınvestısııalyq tartymdylyǵy joǵary el retinde tanytpaq.
ALMATY
