Federasııa basshysy Ádilet Bármenqulov shekten shyqqan Cherchesovke aıyppul salynǵanyn aıtty.
«Qatelikter bar, biz bul týraly keshe ǵana jýrnalıstermen sóılestik. Cherchesovtyń ázili, árıne, shekten shyqty. Men onymen jeke sóılestim, memlekettik tildiń ózektiligi men mańyzyn túsindirdim. Biz ol týraly Cherchesovtiń ózimen sóılestik. Oǵan aıyppul salyndy», dedi federasııa basshysy Ádilet Bármenqulov.
Federasııa málimetinshe, aıyppul sommasy - 200 AEK nemese 738 400 teńge.
Buǵan deıin Qazaqstan fýtbol komandasynyń bas bapkeri Stanıslav Cherchesov qazaq tilinde suraq qoıǵan jýrnalıske «sen fransýz tilinde sóılep otyrsyń ba?» degen. Osy sózi qoǵamda qyzý talqyǵa túsip, ony synaǵandar kóbeıdi.
Qazaqstan fýtbol federasııasy bul oqıǵany bylaı túsindiredi.
«Áleýmettik jelilerde jarııalanǵan fýtboldan Qazaqstan ulttyq quramasynyń bas bapkeri Stanıslav Cherchesovtiń qazaq tiline qurmet kórsetpeýine qatysty vıdeoǵa baılanysty Qazaqstan fýtbol federasııasy jaǵdaıdy túsindirip ótý qajet dep sanaıdy. Jazbada vıdeonyń úzindisi kórsetilgen. Negizi bul suraqty Fransııanyń PSJ klýbynyń formasyn kıip júrgen otandyq jýrnalıst Begasyl Seıitqanov baspasóz máslıhatynda qoıǵannan keıin bas bapker ázildep jaýap qaıtarǵan edi. Stanıslav Cherchesov qazaq tili men elimizdiń mádenıetine úlken qurmetpen qaraıdy, sonymen qatar qazaq tilin belsendi túrde oqyp jatqanyn málimdeımiz», delingen málimdemede.
