Sýret: halykfund.com
Is-sharaǵa bokstan Olımpııa oıyndarynyń jeńimpazy Ermahan Ibraımov, djıý-djıtsýdan segiz dúrkin álem chempıony Jibek Qulymbetova, ózge de tanymal sportshylar qatysty. «AuylSport» jobasyn kópshilikke «Halyk» qaıyrymdylyq qorynyń Almaty oblysy boıynsha fılıalynyń dırektory Ǵalymbek Jaqsylyqov tanystyrdy. Jobanyń negizgi maqsaty – aýyl balalary men jasóspirimderin sportqa tartý, sportty nasıhattaý, buqaralyq sportty damytý, jattyqtyrýshylardyń biliktiligin arttyryp, olardy jańa daǵdylarǵa beıimdeý. Osy oraıda boks, kúres, karate, basketbol, voleıbol, shahmat sekildi sporttyń alty túri qamtylǵan.
– Sport salasyndaǵy jetistikterdi Olımpııa oıyndarymen baılanystyratynymyz belgili. Asa iri halyqaralyq jarystarda el mereıin asqaqtatyp júrgen sańlaqtardyń basym bóligi aýyldan shyqqan. «Halyq» qaıyrymdylyq qory #AýylFýtbol jobasyn qoldaý barysynda talaı-talaı ózekti máselelerge nazar aýdaryp, eldi mekenderde fýtbol ǵana emes, basqa da sport túrlerin damytýdy qolǵa aldy. Osylaısha, «AuylSport» jobasy dúnıege keldi. Joba aıasynda elimizdiń barlyq óńirinde 6 sport túrinen 12 myńǵa jýyq aýyl balasyn qamtý kózdelip otyr, – dedi Ǵ.Jaqsylyqov.
Atalǵan jobany júzege asyrý joly qandaı? Eń bastysy, barlyq is-sharalar óńirler men aımaqtarǵa jeke-jeke bólinip, toptastyryldy. Ár aımaqqa úılestirýshi bekitildi. Joba aıasynda joǵaryda atalǵan 6 sport túrinen 8-14 jas aralyǵyndaǵy jastar men jasóspirimder arasynda aımaqtyq týrnırler men sol jarystardyń jeńimpazdary arasynda respýblıkalyq qorytyndy báseke uıymdastyrylady. Sonymen qatar jattyqtyrýshylardy oqytý, olardyń biliktiligin arttyrý, taqyryptyq semınarlar ótkizý, tóreshiler isine, kommýnıkasııalyq daǵdylarǵa, áleýmettik jelilerde belsendi jumys isteýge basa nazar aýdarylady. Týrnır jenimpazdary men júldegerlerin sporttyq kıimder, jattyǵý quraldarymen qamtamasyz etý, oqý-jattyǵý jıyndaryn uıymdastyrý, chempıondardyń respýblıkalyq, halyqaralyq týrnırlerge qatysýyn qamtamasyz etý de qatań eskeriledi. Eń sońynda jyl qorytyndysy shyǵarylyp, jobanyń úzdik sportshylary marapattalady.
Kúni keshe ǵana Sport jáne týrızm akademııasy men «Halyk» qaıyrymdylyq qory yntymaqtastyq týraly memorandýmǵa qol qoıdy. Memorandým aýyldyq jerlerde sportty damytýǵa baǵyttalǵan birlesken jobalardy júzege asyrýdyń jańa kezeńin bastaıdy. Taǵy bir aıta keterlik jaıt, «Halyk» qaıyrymdylyq qorynyń bul jobasy elimizdiń túkpir-túkpirindegi muqtaj jandardy qoldaýǵa, halyqtyń ómir súrý jaǵdaıyn jaqsartýǵa baǵyttalǵan. Uıym aýyldaǵy sportty damytýǵa osyǵan deıin 500 mıllıonǵa jýyq qarjy bóldi. Sondaı-aq osy kúnge deıin 120-dan astam áleýmettik jobany júzege asyryp, oǵan 85 mıllıard teńge kóleminde qarajat jumsady.
