Foto: QR TJM
Qyrǵyzstan Respýblıkasy Tótenshe jaǵdaılar mınıstrliginiń málimetinshe, 9 qazanda Qanysh-Qııa aýylynan 14 adam arnebııa ósimdikterin jınaýǵa taýǵa shyǵyp, iz-túzsiz joǵalǵan. 16 qazanda jedel-izdestirý sharalarynyń nátıjesinde 8 adam tiri tabylǵan. Qalǵan 6 adamdy izdeý jumystary áli de jalǵasyp jatyr. Olardy qar kóshkini basyp qalǵan degen boljam bar.
Vedomstvonyń mınıstri Boobek Ájikeev zardap shekkenderdi izdeý jumystary úshin tikushaq daıyndalyp jatqanyn aıtty.
«Aýa raıy qolaıly bolǵan kezde, tikushaq dereý izdeý ornyna attanady. Zardap shekkenderdiń naqty meken-jaıy anyqtalǵannan keıin oqıǵa ornyna Tótenshe jaǵdaılar mınıstrliginiń 15-20 qutqarýshy toby attanady. Ol 2-3 kúnge sozylady. Top barlyq qajetti quraldarmen, sonyń ishinde úzdiksiz baılanys pen aqparatty habarlaý úshin spýtnıktik baılanyspen jabdyqtalady. Sodan keıin evakýasııalaý úshin 6 atpen jabdyqtalǵan ekinshi qutqarý toby jolǵa shyǵady. Jaǵdaı meniń baqylaýymda», dedi basqarma basshysy.
Tabylǵan adamdardyń málimetinshe, 14 qazan kúni saǵat 18:00 shamasynda Aq-Saı asýynda qar kóshkini júrip, onyń astynda alty azamat qalǵan.
