Qalalyq ishki saıasat jáne jastar isteri jónindegi basqarmanyń basshysy, QHA janyndaǵy aqsaqaldar, analar keńesi qoǵamdyq uıymdarynyń jetekshileri men músheleri, zııaly qaýym ókilderi, etnomádenı birlestikterdiń tóraǵalary men qoǵam belsendileri osy festıvalǵa qonaq retinde shaqyryldy. Uıymdastyrýshylardyń aıtýynsha, is-sharanyń negizgi maqsaty – etnos ókilderin qoǵamdyq bastamalarǵa uıystyryp, sol arqyly olardy memleket quraýshy qazaq halqynyń mańaıyna toptastyrý, ári ultymyzdyń qonaqjaılylyq dástúrin dáripteý.
О́tken jyldary etnos ókilderi et asýdan, qazaqtyń ulttyq taǵamdaryn ázirleýden, ultymyzdyń umyt bola bastaǵan taǵamdaryn daıyndaýdan ózara saıysqa túsken edi. Etnomádenı birlestik músheleri bıyl da sol dástúrdi jalǵastyryp, keń dastarqan jaıdy, oǵan qazaqtyń ulttyq taǵamdaryn qoıdy. Kelgen qonaqtar jaınap turǵan sol dastarqandy kórip qyzyǵa tamashalady. Úlken qazanǵa et asylyp, ústel basyndaǵy qonaqtarǵa tabaq tartyldy, túrli ulttyq taǵamdar usynyldy. Osylaısha etnos ókilderi qazaqtyń qonaq kútý dástúrin, ulttyq taǵamdaryn ázirleýdi jap-jaqsy meńgergenderin jurtshylyqqa kórsetti.
Qalalyq ishki saıasat jáne jastar isteri jónindegi basqarmanyń basshysy Á.Jumaǵulova quttyqtaý sóz arnap, atalǵan is-sharanyń jalpyulttyq qundylyqtardy óskeleń urpaq jadynda jańǵyrtýǵa septigi mol ári etnos ókilderin bir arnaǵa uıystyryp, mańyzdy qundylyqtardy dáriptegen bul festıvaldyń mazmuny tereń ekenin aıtty.
«О́tkenimiz ben búginimizdi salystyrǵan janǵa búgingi is-sharanyń mánin uǵyný asa qıyn emes. Bárimizdiń basymyzdy qosyp otyrǵan – qazaqtyń berekeli dastarqany. Kezinde keńestik ókimettiń solaqaı saıasatynyń saldarynan qazaq dalasyna talaı ult pen ulys jer aýdarylǵany belgili. Biraq qazaq halqynyń peıilindeı keń dastarqany bárin ashtyqtan aman alyp qaldy. Sondyqtan syılastyq, dostyq, qonaqjaılylyq sekildi uǵymdar barsha azamattardyń dúnıetanymy men ómir salty bolýǵa tıis. Bul – bizdiń baǵa jetpes qundylyǵymyz. Ol barda ortaq úıimiz – elimizde beıbitshilik pen qoǵamdyq kelisim máńgi jasaı beredi», dedi sala jetekshisi.
Dastarqan basynda bata bergen qalalyq QHA janyndaǵy aqsaqaldar keńesiniń tóraǵasy Orynbaı Rahmanberdıev: ««Qazaq dastarqany» festıvaliniń maqsaty – as iship, aıaq bosatý emes, eń bastysy – osy eldiń árbir azamatynyń qarashańyraǵy bolǵan elimizde barsha halyqtyń bir-birimen tatý-tátti ǵumyr keship jatqanyn kópke bildirý. Bir qazannan as iship, bir dastarqanda bas qosyp, ózara syılastyqtyń, tatýlyqtyń týyn jyqpaı kele jatqanymyzdy dúıim jurtqa kórsetý», dedi.
Festıval barysynda qalalyq Salt-dástúr jáne ádet-ǵuryp ortalyǵynyń mamandary qazaqtyń salt-dástúri men ulttyq taǵamdary týraly jan-jaqty maǵlumat berdi.
Bıyl osy is-sharaǵa alǵash ret qatysqan qalalyq «Assambleıa jastary» uıymynyń ókili Nýralı Gýseınov «Qazaq dastarqany» festıvalinen keremet áser alǵanyn aıtty.
– Úlken atamyz qazaq halqyn qurmettep júrińder dep qulaǵymyzǵa quıyp otyratyn. Jaryqtyq, aıtqan árbir áńgimesinde qazaq dalasyna qalaı kúshtep kóshirilgenin, japan túzde qalyp qoıǵanda qazaqtardyń jatsynbaı baýyryna jaqyn tartyp, dastarqanyndaǵy nan, qurtymen bóliskenin eske túsirip, kózine jas alatyn. Jeıtin tamaq tappaı qınalǵanda, qazaq aǵaıyn shańyraǵyna shaqyryp, dastarqanyn jaıyp jiberetin de, ishinen árqaısymyz bir-bir qurt, bir úzim nannan alyp, júrek jalǵap, basymyz baqyttan aınalatyn deıtin. Rasynda qazaqtyń dastarqany – berekeniń bastaýy ǵoı shirkin. Sebebi qanshama ult pen ulys osy dastarqannyń kıesiniń arqasynda aman qaldy. Al ózi jarymasa da, qolyndaǵy barymen bólisý kez kelgen adamnyń qolynan kele bermeıtin is ekeni anyq. Biraq ta qazaq halqy naǵyz adamı qasıettiń úlgisin kórsetti. Dalasy qandaı keń bolsa, kóńili de sondaı darhan ekenin dáleldep berdi. Sondyqtan óz basym qazaq eline, onyń berekeli dastarqany men keń peıiline sheksiz rızamyn, ári atam ósıettegendeı, qazaq eline árdaıym qyzmet etip ótemin», dedi «Assambleıa jastary» uıymynyń jetekshisi.
Aıta ketý kerek, Qazaqstan halqy Assambleıasynyń «Qazaqtaný» jobasynyń aıasynda qolǵa alynǵan «Qazaq dastarqany» festıvali alǵash ret 2015 jyly Shymkentte bastaý alǵan bolatyn. Jyl saıyn qalalyq assambleıanyń uıytqy bolýymen túrli mazmunda ótetin festıval bıyl osymen toǵyzynshy ret uıymdastyrylyp otyr.
ShYMKENT
