О́ńirlik kommýnıkasııa qyzmeti ortalyǵynda ótken baspasóz jıynynda baǵdarlamanyń bıylǵy sharty, talaby, maqsaty jóninde aıtyldy.
«Atalǵan baǵdarlama óńirdiń barlyq qalalary men aýdandarynda túrli salada eńbek etip júrgen 34 jasqa deıingi jas mamandarǵa arnalǵan. О́tinimder 21 qazannan bastap 1 qarashaǵa deıin qabyldanady. Úmitkerdiń kem degende bir jerde alty aılyq jumys ótili jáne oblys aýmaǵynda tirkelgen turaqty mekenjaıy bolýy kerek. Baǵdarlamaǵa otbasy músheleriniń bireýi ǵana qatysa alady. Qatysyp jatqan úmitkerlerdi arnaıy komıssııa anyqtaıdy. Qatysýshylardy irikteý ashyq túrde ótedi, ol konkýrstyq komıssııa otyrysynda baldyq júı boıynsha júrgiziledi. Úmitkerler birdeı upaı jınaǵan jaǵdaıda, jasy úlken qatysýshyǵa artyqshylyq beriledi», deıdi oblystyq Qoǵamdyq damý basqarmasy basshysynyń orynbasary Ásel Qulmaǵambet.
«Otbasy bank» AQ Qostanaı fılıalynyń dırektory Ásel Asqarovanyń aıtýynsha, atalǵan baǵdarlama aıasynda jas kásipkerlerge de qoljetimdi baspana alý múmkindigi berilip otyr.
«Baǵdarlamaǵa qatysýshylardyń aılyq tabysy da eskeriledi. Mysaly, erli-zaıyptylardyń, olarmen birge turatyn ata-anasynyń sońǵy jarty jyldyq tabysyn alty aıǵa shaqqanda aı saıyn 150 AEK-ten, ıaǵnı 553 myń 800 teńgeden aspaýǵa tıis. Sonymen qatar ótinim berýshiniń basynda sońǵy bes jyl ishinde tirkelgen baspanasy bolmaýy kerek», deıdi fılıal basshysy.
Jalpy, «Qostanaı jastary» óńirlik turǵyn úı baǵdarlamasy aıasynda ár salada qarapaıym eńbek etip júrgen kóptegen jas otbasynyń jaıly baspanaǵa qol jetkizip jatqany qýantady. Aılyǵy asyp-tasyp bara jatpasa da, oblys ákimdigi men «Otbasy banktiń» utymdy sheshiminiń nátıjesinde qysqa merzim ishinde «óz úıi – óleń tósegine» qol jetkizip, baspana qýanyshyna kenelip jatqan qarapaıym eńbek jastary kóp. Sonyń biri – oblystyq jedel járdem kóliginiń júrgizýshisi Baqytbek Dosmaǵulov.
«Biraz jyl páter jaldap keldik. «Qostanaı jastary» baǵdarlamasy shyqty degendi estip, qujattarymdy jınap, qalalyq ákimdiktiń janyna jumys isteıtin «Ikomek» ortalyǵyna baryp kezekke turdym. Jarty aı ótpeı, «Siz atalǵan baǵdarlama boıynsha konkýrstan óttińiz» degen habar aldyq. Osylaısha, 7 jylǵa 5 paıyzdyq jyldyq syıaqymen (JTSM 5,2% bastap 5,5% deıin) nesıe alyp, úsh bólmeli páter aldyq. «Otbasy bankinde» 1 mln 500 myń teńge depozıtimiz bar edi, ony bastapqy jarna retinde kádege jarattyq. Nesıe sharty basqa baǵdarlamalarǵa qaraǵanda kóp jeńil. Úsh balamyz bar. Úsheýi de úıdiń janyndaǵy mektepke baryp júr. Eń bastysy, buryn ózimiz jaldap turyp jatqan páterdiń aqysyna ketetin qarjyny, óz menshigimizdegi úıdiń qaryzyn jabýǵa jumsap jatyrmyz», deıdi Baqytbek.
Atalǵan baǵdarlamanyń sharapatyn qala jastarymen qatar, aýylda turyp jatqan jas otbasylar da kórip otyrǵanyn aıtpaı ketýge bolmas. Mysaly, Qostanaı aýdanyndaǵy Ozernyı aýylynyń ýchaskelik medbıkesi Lıýbov Býtenko osy «Qostanaı jastary» baǵdarlamasy arqyly aýdan ortalyǵynan úsh bólmeli páter satyp alyp otyr.
«Basqa ıpotekalyq baǵdarlamalarǵa qatysý úshin páter qunynyń 50 paıyzyn jınaý kerek. Al biz 10-aq paıyz bastapqy jarna jınadyq. Nesıe paıyzy kóp emes, 5-aq paıyz bolady (JTSM 5,2% bastap 5,5% deıin). Bir-eki jyldan keıin 2 paıyzǵa túsedi. Bul – biz sııaqty qarapaıym otbasylar úshin óte qolaıly baǵdarlama», deıdi L.Býtenko.
«Qostanaı jastary» baǵdarlamasy aıasynda óńirde 2022 jyly – 49 otbasy, 2023 jyly 159 otbasy baspanaly bolǵan. Bıyl taǵy 127 jas otbasy qonys toıyn atap ótedi.
«Biz kvota bólgende, qalalar men aýylda turyp jatqan jastardyń sany jónindegi statıstıkalyq málimetke súıenemiz. Byltyr 140 adamǵa kvota bólgenbiz, biraq 159 adam baspanaly boldy. Bıyl 127 adam dep eseptep otyrmyz. Biraq jańa baspanaǵa qol jetkizgen jas otbasylardyń sany odan da kóp bolýy múmkin», deıdi oblystyq Qoǵamdyq damý basqarmasynyń orynbasary Ásel Qulmaǵambet.
Qostanaı oblysy
