Aslanbek byltyr Qaraǵandy joǵary tehnıkalyq kolledjin «Tótenshe jaǵdaılardaǵy qorǵanys» mamandyǵyna oqyp bitirdi. Sodan soń birden Qaraǵandy oblysy Tótenshe jaǵdaılar departamenti «О́rt sóndirý jáne avarııalyq-qutqarý jumystary qyzmeti» respýblıkalyq memlekettik mekemesiniń №10 órt sóndirý bóliminiń órt sóndirýshi-qutqarýshysy bolyp qyzmetke turdy.
– Bizdiń bólim – shaqyrtýlarǵa eń kóp shyǵatyn bólimderdiń biri, táýligine on shaqty túrli qońyraý túsedi. Árıne, jan túrshigetin oqıǵalarmen de jıi ushyrasamyz. Onyń bári júrekke ońaı tımeıdi. Biraq ár qutqarýshy ondaı kezde tastaı qatty, jeldeı jyldam bolý kerek. Sekýndtyń ózi bireýdiń taǵdyryn sheshedi. Abdyrap qalý – eń úlken qatelik. Soǵan jol bermeý kerek, – deıdi kishi serjant Aslanbek Tursyn.
Aslanbek – ózin eń alǵashqy qutqarý jumysynan-aq kórsete bilgen jas maman. Byltyr kúzde poıyz ben jeńil kólik qaǵysyp, jan túrshigetin jol apaty boldy. Sonda kóliktiń ishinde kóz jumǵan eki adamnyń múrdesin kóre tura salqyndyq tanytyp, ishindegi qysylyp qalǵan basqa jolaýshylarǵa jyldam kómek berdi.
– Qutqarýshy mamandyǵynda bastysy óziń myqty bolýyń kerek, túrli oqıǵa men jaǵdaı bolady. Sol kezdegi bar oıyń – adam janyn aman arashalap qalý. Jas maman Aslanbek bul mindetine adal. Shapshań. Shymyr. Júrekti. О́zine júktelgen basqa da jumysyna tııanaqty. Jas bolsa da ujymda bedeli bar, – deıdi №1 qaraýyl bastyǵy, aǵa leıtenant Madııar Nurmuhan.
Jaqynda quramynda Aslanbek bar qutqarýshy top qaladaǵy Molokov kóshesindegi 94-úıdiń tórtinshi qabatyndaǵy órtten bir otbasyny aman alyp shyqty. Qyzyl jalynnyń ishinen egde jastaǵy ájeıdi, kishkentaı bala men jasóspirim qyzdy qutqardy.
«Negizi ońaı bolǵan joq. Biz kelsek páter ishi qyp-qyzyl, ot sharpyp tur. Ishinde adam baryn bilip, jasaqtaǵy úsheýmiz de bir mezgilde kirdik. Men ájeıdi alyp shyqtym, qasymdaǵylar eki balasyn qutqardy. Az ýaqyttyń ishinde órtti de aýyzdyqtadyq. Bastysy, ishindegi adamdar aman. О́zim ár adamnyń ómirine arasha túsken saıyn, boıyma kúsh-jiger jınaımyn», deıdi jas qutqarýshy.
Qaraǵandy oblysy
