Qazaqstan 2025 jyly saıahattaýǵa arnalǵan úzdik elderdiń tizimine endi

Jýrnal sarapshylary jyl saıyn saıahatshylar, qyzmetkerler, avtorlar jáne týrızm salasyndaǵy basqa da mamandardyń usynystaryna negizdelgen baǵyttardy muqııat taldap, úzdikterdi anyqtaıdy. 2025 jylǵy tańdaý Qazaqstanǵa túsip otyr. Bizdiń elimiz óziniń baı tarıhymen, alýan túrli tabıǵatymen jáne qaıtalanbas mádenı murasymen sheteldik sala mamandaryn qyzyqtyrǵan.

«Qazaqstannyń Lonely Planet sekildi álemdegi bedeldi basylymnyń Best in Travel 2025 reıtınginde bolýy – elimizdiń týrızmine álem boıynsha qyzyǵýshylyqtyń artyp kele jatqanyn kórsetedi. Eldiń shynaıy mádenıeti men alýan túrli tabıǵatyn halyqaralyq deńgeıde ilgeriletýdi jalǵastyra otyryp, biz turaqty týrızm prınsıpterin ustanamyz», dedi QR Týrızm jáne sport vıse-mınıstri Erjan Erkinbaev.

Álemniń bedeldi basylymynyń tizimine engen Qazaqstan ejelgi dástúr men zamanaýı ómir toǵysqan el retinde sıpattalǵan.

«Best in Travel 2025 — bul bizdiń jyl saıynǵy álemge arnalǵan júrekjardy hatymyzdyń sońǵy nusqasy. Biz osy basylymǵa engen baǵyttardy maqtan tutamyz jáne usynystarymyzdyń negizinde jatqan tereń túsinik pen jergilikti bilimmen bólisýge qýanyshtymyz. Bizdiń tizim kelesi jyly saıahatshylarǵa jańa baǵyttardy ashýǵa shabyttandyrady dep senemiz», dedi Lonely Planet-tiń kontent boıynsha aǵa vıse-prezıdenti jáne atqarýshy redaktory Nıtıa Chambers.

Lonely Planet basylymynyń maqalasynda: «Qazaqstan – tek saıahattaıtyn el emes, ashylýy tıis álem, saparǵa shyǵýdy qajet etetin jáne tarıhtyń bir bólshegi bolatyn el. Ejelgi Jibek jolynyń sybdyry Qazaqstan qalalaryn qorshap turǵan sheksiz dalada da estiledi», dep jazylǵan.

Aıta keterligi, Qazaqstannyń týrıstik áleýetin tek Lonely Planet jýrnaly ǵana emes, álemge tanymal týrıstik basylymdar da joǵary baǵalaǵan. Máselen, Conde Nast Traveler men Wanderlust basylymdary Qazaqstandy 2024 jylǵy álemdegi eń úzdik saıahat baǵyttarynyń tizimine engizgen. Almaty qalasy The New York Times reıtıngi boıynsha 52 úzdik týrıstik baǵyttyń qataryna kirdi.