Jobany uıymdastyrýshylar Prezıdent janyndaǵy Memlekettik basqarý akademııasynyń óńirlik fılıalynyń qoldaýymen 45 aptanyń ishinde Abaıdyń 45 qarasózin tushynyp oqyp, búgingi adam, qazirgi qoǵam minezimen sabaqtastyra taldaýdy kózdep otyr.
«Abaıdyń qarasózderi» chellendjin birinshi bolyp bastap bergen oblys ákiminiń orynbasary Rınat Muhametqalıevtiń aıtýynsha, oflaın jáne onlaın rejimde júrip jatqan taldaý sabaqtaryna memlekettik qyzmetshilermen qatar kóptegen muǵalim, stýdent jastar qyzyǵýshylyq tanytyp otyr.
«Abaı kúnin» qalaı ótkizsek durys bolady degen izdenispen júrgen edik. Demalys kúni velosıpedpen kele jatyp, oıyma osy ıdeıa sap ete qaldy. Mundaı is-sharalar bir kúnmen shektelip qalmaýy kerek. Erteńinde Prezıdent janyndaǵy Memlekettik basqarý akademııasynyń óńirlik fılıalyna habarlasyp: «Abaıdyń qarasózderi» atty chellendj uıymdastyraıyq dep edik. Ony ózim bastap bergim keledi. Sizderde bilik-bilimin jetildirip jatqan memlekettik qyzmetshiler bar ma?», dep suradym. Ol kisiler qazir jıyrma adam oqyp jatqanyn, birinshi dáristi sol topqa oqýǵa bolatynyn aıtty. Sodan ózim jıi qaıtalap oqıtyn «Eger esti kisilerdiń qatarynda bolǵyń kelse, kúninde bir mártebe, bolmasa jumasynda bir, eń bolmasa aıynda bir, ózińnen óziń esep al!» dep keletin on besinshi qarasózdi tańdap alyp, daıyndala bastadym. Slaıd jasap, bilim basqarmasynan ózime kerek málimetterdi suratyp aldym. Úlken jetistikke jetken tulǵalar, olardyń shyńdalý, ósý joly, adamǵa óz maqsatyna jetýine kedergi keltiretin kesir ádetter, odan arylýdyń amal-joldary týraly aqparat jınadym. Dáris ózime de, tyńdaýshyǵa da unady. Qyzyqty oılar aıtyldy, qyzý pikirtalas ta boldy. Odan keıin chellendj kezegin oblystyq máslıhattyń depýtaty Qyrmyzy Saparqyzyna usyndym. Osylaısha, bul joba sátti jalǵasyn taýyp kele jatyr», deıdi Rınat Zákıuly.
Qostanaı oblysy
