Búgingi tańda UFC-degi orta salmaqtyń altyn belbeýin Belal Muhammad ıelenip otyr. Bıyl jazda ol Anglııanyń Manchester qalasynda uıymdastyrylǵan jarysta jergilikti faıter Leon Edvarsty jeńgen soń osy mártebesi asa joǵary ataqqa qol jetkizdi. Endi arada bes aıǵa jýyq ýaqyt ótken soń Shavqat Rahmonovtyń chempıondy tuǵyrdan taıdyrýy ábden múmkin. Qazirgi kezde kópshiliktiń pikiri osyǵan saıady.
Aralas jekpe-jekti 2012 jyldan beri serik etip kele jatqan 36 jastaǵy AQSh-tyń Chıkago qalasynda týyp-ósken palestınalyq sportshy óz karerasynda 28 márte oktagonǵa shyǵyp, 24 ret jeńiske jetti. Úsh kezdesýde utylyp, taǵy bir básekeniń nátıjesi esepke alynbady. Sol saıystardyń tek altaýyn ǵana Muhammad aıqyn basymdyqpen aıaqtady. Tarqatyp aıtsaq, bes qarsylasyn nokaýtqa jiberse, taǵy bireýin «qylqyndyrý» ádisimen utty. Qalǵan 18 jekpe-jektiń sheshimin tóreshiler shyǵardy. Iаǵnı Belaldy «pancher» dep aıtý qıyn. Sonymen qosa ol ózi de bir ret nokaýtqa tústi. 2016 jyldyń kúzinde Nıý-Iorkte uıymdastyrylǵan týrnırde brazılııalyq Vısente Lýkeniń ony birinshi raýndta uryp jyqqany esimizde. Al Alan Djýban men Nıl Djefften Palestınanyń ókili upaı sanymen utyldy. Dál sol Djeffti bizdiń Rahmonov byltyr kóktemde «qylǵyndyryp» tastaǵan bolatyn.
Desek te aldaǵy jarysta Shavqatqa jeńis ońaılyqpen keledi dep aıtý qıyn. UFC-de segiz jyl judyryqtasyp, 18 jekpe-jek ótkizgen Belal Muhammad ábden ysylǵan saqa sportshy. Sol aralyqta ol Laıman Gýd, Dıego Lıma, Demıan Maııa, Stıv Tompson, Vısente Lýke, Shon Bredı, Gılbert Berns syndy marqasqalardy jeńdi. Muhammad qarsy kelgenin qoǵadaı japyrmasa da, onyń batyldyǵy men shydamdylyǵy, tózimdigi men tabandylyǵyna tańdanbaý múmkin emes. Ár básekede saýatty taktıka ustana biledi, kóbine-kóp táýekelge barmaıdy. Fýnksıonaldyq daıarlyǵy óte jaqsy. Ol árbir kezdesýde qarsylastaryn dińkeletip baryp utady. Soǵan da basa nazar aýdarǵan jón.
Al Shavqattyń jóni bólek. Taıaý kúnderi 30 jasqa tolǵaly otyrǵan qazaqtyń qaısar uly 18 jekpe-jektiń barlyǵynda aıqyn basymdyq tanytty. Segiz qarsylasyn «qylǵyndyrý», «aýyrtý» tásilderimen utty. 10 básekelesin aýyr soqqylardyń astyna alyp, olarǵa «Qıyr Shyǵystyń qaıda ekenin» kórsetti. «Nomad» toǵyz básekeni birinshi, jeti kezdesýdi ekinshi raýndtarda aıaqtady. Tek tájik Farýddın Odılov (2018 jyl) pen amerıkalyq Djeff Nıl (2023 jyl) ǵana úshinshi raýndqa deıin shydady. Biraq Rahmonov birde-bir jekpe-jekti sońyna deıin sozǵan emes. Mine, osy jaıttar Shavqattyń bedelin sharyqtatyp tur.
Sonymen, 7 jeltoqsanda kúlli álem jankúıerleriniń nazary Las-Vegasqa aýady. Ásirese halqymyzǵa bul erekshe kún. Buǵan deıin qazaqtyń ór minezdi órenderi talaı beldi promoýshenderdiń altyn belbeýlerin ıelengenin jurt jaqsy biledi. Al aralas jekpe-jek álemindegi eń bıik shyń – UFC ekeni daýsyz. Ázirge bul beles bizge baǵynǵan joq. Eger Shavqat Rahmonov alystaǵy Amerıkada atoı salyp, chempıondyq tájdi ıelense, onda Alash jurtynyń talaı jylǵy armany oryndalyp, qazaqtyń jigitteri ózderiniń myqtylyǵyn túbegeıli moıyndatady.
