Sýretti túsirgen – Erlan OMAR, «EQ»
Bas kitaphananyń kireberisine qyzyl kilem tóselip, el aımaqtarynan kelgen júzdegen kitaphanashyny uıymdastyrýshylar aıryqsha qurmetpen qarsy aldy. Olardyń arasynda búkil ǵumyryn kitaphana isimen ushtastyrǵan sala ardagerleri de bar. Saltanatty is-shara Mádenıet jáne aqparat mınıstri Aıda Balaevanyń beıne-quttyqtaýymen ashyldy.
«Barshańyzdy kásibı merekemen quttyqtaımyn. «Adamdy adam etken – kitap, adamzat etken – kitaphana» dep Ábish Kekilbaıuly aıtqandaı, kitaphana – óner men mádenıettiń, shyǵarmashylyq pen rýhanııattyń qasıetti ordasy. Ǵalymdardyń, oıshyldar men jazýshylardyń kól-kósir bilimi, janqııarlyq jumystary kitaptarda saqtalǵan. Al bul baǵa jetpes qazynany saqtaýshy – kitaphanalar men onda qyzmet etetin adamdar. Memleket basshysy Qasym-Jomart Toqaev Ulttyq quryltaıda kitap oqıtyn ultqa aınalýymyz kerektigin aıtqan edi. Elimizdiń kitaphana qorynda 73 mln shamasynda kitap bar. Sondaı-aq sıfrly qordyń elektrondy kóshirmesi 77 myńnan asty. 2020-2024 jyldary aralyǵynda kitaphana oqyrmandarynyń sany 3 mln-nan 5 mln-ǵa deıin kóbeıip otyr. Bul jumystarda kitaphanashylardyń eńbegi ólsheýsiz. Aqparattyq tehnologııa jetistikteri kitaphanalar úshin jańa múmkindikterge jol ashty. Bul baǵytta qarqyndy damyp kele jatqan jobalardyń biri retinde Qazaqstan ulttyq elektrondy kitaphanasy portalyn ataýǵa bolady.
Kitaphanalar zamanaýı qurylǵylarmen jaraqtalyp, oqyrmandar men qyzmetkerlerge qolaıly jaǵdaı jasalýda. Mınıstrlik tarapynan áleýmettik mańyzy bar kitaptardy basyp shyǵarý men taratýda aýqymdy jumystar atqarylyp jatyr. Keıingi jyldary el kitaphanalary 4,5 mln dana kitappen tolyqty. Bıyldyń ózinde 200-ge jýyq ádebı kitap 506 myń danamen tutas el aımaqtaryna taratyldy. Mınıstrlik kitaphanalardyń materıaldyq-tehnıkalyq bazasyn jetildirý, kitaphana qyzmetkerleriniń jalaqysyn arttyrý baǵytyndaǵy máselelerdi de nazarǵa alyp otyr. Memleket tarapynan kitaphanashylardyń biliktiligin arttyrýǵa erekshe kóńil bólinedi. 2024-2025 oqý jyldary kitaphana mamandaryna arnalǵan oqý granttarynyń sany da 5 esege deıin ulǵaımaq. Qazirgi kezde kitaphanalardy qoǵam múddesine saı damytyp, olardyń qoryn kóbeıtý, jumystarynyń jańa túrlerin engizý jáne jasandy ıntellekt múmkindikterin paıdalaný óte mańyzdy. Kásibı mereke qarsańynda kitaphana qyzmetkerlerine kúndelikti qajyrly qyzmeti, ulttyq jáne álemdik murany saqtaı otyryp, oqyrmandardy aqparatpen qamtamasyz etýde atqaryp jatqan eseli eńbegi úshin alǵys aıtamyn», dedi mınıstr óz quttyqtaýynda.
Sondaı-aq is sharada IFLA – Kitaphanalyq qaýymdastyqtar men mekemelerdiń halyqaralyq federasııasynyń prezıdenti Vıkkı Makdonald kásibı mamandarǵa beıne-quttyqtaý joldap, kitaphana isin óristetý órkenıetti elderdiń ıgilikti qadamy ekenin, álemdi izgilike shaqyrýda kitaphanashylardyń róli úlken mańyzǵa ıe ekenin aıtty.
Merekede óńirlerden kelgen úzdik qyzmetkerlerge qurmet kórsetilip, eren eńbegimen elengen mamandarǵa tósbelgiler men Alǵyshattar tabystaldy. Mádenıet jáne Aqparat mınıstrligi Arhıv, qujattama jáne kitap isi komıtetiniń tóraǵasy Rýstam Álı qasterli mamandyqtyń qadiri men bedelin arttyrý mańyzdy mindet ekenine toqtalyp, mádenı murany saqtaý, kitap oqıtyn bilimdi ult qalyptastyrý baǵytyndaǵy jumys jalǵasa beretinin jetkizdi.
Aıtýly merekede Anar Ábdirahmanova, Gúljan Qalıeva, Sáýle Esenqulova, Olga Malseva, Mahambet Harmysov, Jemis Janǵylysheva, Gúljaýhar Esentaeva, Aıtbala Jolmahanova, Gúlshat Tursynqyzy, Baıan Ýataeva, Láılá Syzdyqova, Meıramkúl О́tegenova, Pernekúl Naltaeva, Rıza Ibraımova qatarly úzdik mamandar «Mádenıet salasynyń úzdigi» tósbelgisimen marapattaldy.
Al Gúlmıra Mahanbetova, Onaı Myrzaǵalıeva, Saılaýgúl Dáýletshına, Aıgúl Jumabekova, Aıgúl Orazqulova syndy kitaphana isine eńbegi sińgen azamattarǵa «Eńbek ardageri» tósbelgisi tabystaldy.
Sonymen birge Mádenıet jáne aqparat mınıstriniń Qurmet gramotasymen jáne Alǵyshatymen Mádına Abdýllaeva, Elena Mýsına, Gúlsimhan Qojaǵulova, Aıgúl Rahmetjanova, Kúlııa Saýryqova, Daraja Jolymbetova, Bıbigúl Qozbekova, Janar Adaıalova, Aqmaral Qurmanova, Merýert Maýsymbekova, Qarlyǵash Orazalınova, Ásemgúl Tólenovalar marapattaldy.
Kásibı merekede qushaǵy gúlge tolyp, marapat alǵandar – elimizdiń ár óńirindegi túrli deńgeıdegi kitaphanalarda qyzmet etetin úzdik mamandar.
«Kitap – dúnıedegi barlyq izgiliktiń bastaý bulaǵy. Barlyq rýhanı qazyna, baılyq osy kitaphanada. Kitaphanashylar kúndelikti túrli kitaptarmen tanysady, oqyrmannyń myń san saýalyna jaýap beredi. Qazirgi kúni oqyrman talaby da kúsheıgen. Qoǵamda kitaphanashynyń róli óte mańyzdy jáne mártebesi de asyp keledi. Bul tek kitaphanashylardyń ǵana emes, kitapty jaqsy kóretin oqyrmandardyń, kitaphanashynyń qoǵamdaǵy orasan zor rólin baǵalaıtyn adamdardyń da merekesi», – deıdi Ulttyq kitaphananyń kitap qoryn tolyqtyrý qyzmetiniń jetekshisi Hanshaıym Musaqyzy.
ALMATY
