foto Senattyń baspasóz qyzmeti
Máýlen Áshimbaev qorshaǵan ortany qorǵaý, ekologııa máseleleri búkil álemdi alańdatyp otyrǵanyna jáne bul Ortalyq Azııa elderi úshin eń ózekti problemalardyń biri ekenine nazar aýdaryp, osy baǵytta parlamenttik dıplomatııanyń mańyzdy ról atqaratynyna toqtaldy.
«Qazir álem jahandyq jylynýmen betpe-bet kelip otyr. Bul úderis bizdiń óńirde de aıqyn sezilýde. Qýańshylyq, sý tasqyndary, Aral máselesi sııaqty syn-qaterler sonyń saldary ekeni anyq. Muzdyqtardyń da erýi alańdaýshylyq týdyrady. Bul – Syrdarııa, Ámýdarııa sııaqty iri ózen sýlarynyń azaıýyna áser etetin ózekti jaıt. Osy máselede óńir elderi ortaq saıasat ustanyp, birlesip jumys isteýdi kózdep otyr. Bul rette parlamenttik dıplomatııanyń da áleýetin keńirek paıdalanǵan abzal», dedi Palata Spıkeri.
Sonymen qatar Máýlen Áshimbaev qazirgi tańda Qazaqstan men О́zbekstan arasyndaǵy Parlamentaralyq komıssııa tıimdi jumys istep kele jatqanyn aıtty. Komıssııanyń jumysy aıasynda senatorlar Aralǵa arnaıy baryp, ózbek áriptesterimen kezdesip, birqatar túıtkilderdi sheshýge, eki eldiń atalǵan saladaǵy qarym-qatynasyn nyǵaıtýǵa qatysty problemalardy talqylady. Sondaı-aq Senat Tóraǵasy ekologııa máselesi boıynsha óńir elderiniń halyqaralyq uıymdar aıasynda ortaq ustanymdary bar ekenin aıtyp, mundaı birlesken jumystyń bereri mol ekenin tilge tıek etti.
«Halyqaralyq Kelisimder, jalpy Odaqtastyq týraly shart aıasynda parlamenttik dıplomatııanyń áleýetin eskergen jón. Qazir Ortalyq Azııada Parlamentterdiń róli kúsheıip keledi. Bizdiń Senat pen О́zbekstannyń Senaty óńirlermen tikeleı jumys isteıdi. Al, Aral máselesi, eń aldymen, óńirge tikeleı qatysty. Sondyqtan osy baǵyttaǵy jumysta Parlamentaralyq komıssııanyń, depýtattardyń múmkindikterin jan-jaqty paıdalanǵan oryndy. Bul Ortalyq Azııadaǵy jáne shekaralyq aýmaqtardaǵy máselerdiń oń sheshilýine óz septigin tıgizedi dep senemiz», dedi Máýlen Áshimbaev.
Aıta keteıik, búgin Palata otyrysynda senatorlar «Qazaqstan Respýblıkasynyń Úkimeti men О́zbekstan Respýblıkasynyń Úkimeti arasyndaǵy ekologııa jáne qorshaǵan ortany qorǵaý salasyndaǵy yntymaqtastyq týraly kelisimdi ratıfıkasııalaý týraly» zańdy qarap, maquldady.
