Bıyl Memleket basshysy Qasym-Jomart Toqaev Joshy Ulysynyń 800 jyldyǵyn memleket kóleminde atap ótý jóninde tapsyrma berdi. Bul bastama qoldaý taýyp, 2024 jyldyń 4 qazanynda Atyraý oblysyndaǵy tarıhı meken, kóne qala Saraıshyqta Joshy Ulysynyń 800 jyldyǵyna oraı otandyq, sheteldik belgili ǵalymdardyń jáne el zııalylarynyń qatysýymen «Saraıshyq jáne Eýrazııanyń ortaǵasyrlyq álemi» respýblıkalyq ǵylymı-tájirıbelik konferensııasy ótken bolatyn.
Búgin sol sharanyń jalǵasy retinde Astana qalasy Qarýly Kúshteriniń Ulttyq áskerı-patrıottyq ortalyǵynda «Joshy Ulysy (Altyn Orda) kezeńiniń tarıhı-mádenı murasy» jyljymaly kórmesi ashyldy.
«Saraıshyq - memleketimizdiń qalyptasýy men damýynda erekshe orny bar, onyń alǵashqy astanalarynyń biri bolǵan qala. Kórmege Joshy Ulysynyń rýhanı ortalyǵyna aınalǵan qasıetti jerden 140 jádiger ákelinip otyr. Uly Jibek jolynda ornalasqan Saraıshyqtyń qysh buıymdary, ádemi boıaýlarmen erekshelenetin syrly ydystar, Horezmdik qumyra, seladon kese (qytaı farfory), albarello (dári-dármek salatyn quty), HIII-XIV ǵasyrlarda Saraıshyq qalasynyń kóshelerinde tóselgen tastary, sý, káriz qubyrlary, shyǵyr qumyralary qoıylǵan. San ǵasyr buryn aqsha ornyna júrgen jyly teńizderden ákelingen kaýrı baqalshaqtary men Saraıshyqtyń mys (pul) jáne kúmis (dırham) aqshalar toptamasy, Zergerlik buıymdar órnekteri, tabıǵı tastardan jasalǵan monshaqtar usynyldy», deıdi «Han Ordaly – Saraıshyq» mýzeı-qoryǵynyń dırektory Ábilseıt Muhtar.
Sonymen qatar kórmede «Ulytaý» memlekettik tarıhı-mádenı jáne tabıǵı mýzeı-qoryǵy, Qaraǵandy oblystyq tarıhı-ólketaný mýzeıi, Jezqazǵan qalasyndaǵy Sátbaev mýzeıi, Qoljazbalar jáne sırek kitaptar ulttyq ortalyǵynan jádigerler men tarıhı qoljazbalar qoıyldy.
Joshy Ulysynyń astanalarynyń biri bolǵan Saraıshyq qalasynyń tarıhynan syr shertetin kórme 23 qazannan 23 qarashaǵa deıin jalǵasady.
