«Atakent» aýrýhanasy bazasynda «Deni saý ult – árbir azamat úshin sapaly jáne qoljetimdi densaýlyq saqtaý» ulttyq jobasy aıasynda kardıohırýrgııa, kardıorevmatologııa, arıtmologııa, nefrologııa, gastroenterologııa, fýnksıonaldyq dıagnostıka boıynsha aýdannyń 284 turǵyny medısınalyq tekserýden ótti. Bul josparlanǵan 180 pasıentten 104-ke kóp, ıaǵnı almatylyq dárigerlerge qaralýshylardyń qatary kóbeıgen. Qaralýshylardyń 260-yna dárigerlik keńes, 27-ine Almatyǵa joldama berildi.
Kardıohırýrgııa bóliminiń meńgerýshisi Rústem Tóleýtaevtyń, júrektiń yrǵaǵy men ótkizgishtiginiń buzylýy bóliminiń meńgerýshisi Baǵdat Ahyttyń qabyldaýyna kelgen 64 adamnyń 58-ine dárigerlik keńes berilse, 6-y ǵylymı-zertteý ınstıtýtyna qaralýǵa joldandy. Sonymen qatar «Atakent» aýdandyq aýrýhanasynda mýltıdıssıplınarlyq sheberlik synyptary uıymdastyryldy. Eki kún boıy aýdan turǵyndaryna qyzmet kórsetken almatylyq bilikti mamandarǵa Atakent kentiniń ákimi S.Ázimov rızashylyǵyn bildirdi. «Kardıologııa jáne ishki aýrýlar ǵylymı-zertteý ınstıtýty» AQ-nyń basqarma tóraǵasy Marat Pashımovtiń aıtýynsha, mundaı joǵarǵy deńgeıdegi mamandandyrylǵan kómek túrleri oblys turǵyndaryna aldaǵy ýaqytta da kórsetiletin bolady.
Túrkistan oblysy
