«Shyǵys Qazaqstannyń ańyz-ápsanalary» jınaǵyna Shyǵys Qazaqstannyń ózen-kól, taý ataýlarynyń shyǵý tarıhy týraly toponımıkalyq ańyzdar, kıeli oryndar men tarıhı tulǵalar jaıly ańyzdar, ertede ólkemizde ómir súrgen ǵajaıyp ta sıqyrly keıipkerler jónindegi ápsanalar engen.
Ásirese, Katonqaraǵaı óńirindegi jaılaýdyń Altyqyz atanýy, Ertis pen Úlbiniń aınymas mahabbaty, taýdyń «Altaı» atalý sebebi, Qandysý ózeniniń tarıhy syndy ólkemizge qatysty kóptegen ańyzdar kez kelgen oqyrman úshin qyzyqty bolary sózsiz.
Jınaqtyń qurastyrýshysy - ólketanýshy, «Mádenıet salasynyń úzdigi», «Kitaphana isiniń ardageri» tósbelgileriniń ıegeri Slıamova Zıza Muhtarhanqyzy Shyǵys Qazaqstannyń tarıhı murasyn uzaq jyldar boıy zerttep, saqtaýmen aınalysyp keledi.
Ańyzdardyń úsh tilde shyǵarylýy ishki-syrtqy týrızmniń damýyna oń áserin tıgizip, aqparatqa degen qoljetimdilikti qamtamasyz etedi.
Zıza Muhtarhanqyzy óz sózinde mádenı murany saqtaý men jastardy týǵan el ańyzdaryn zertteýge tartýdyń mańyzyna toqtaldy. Sharaǵa qatysýshylar ólkeniń tarıhy men bolmysyn taný úshin toponımıkalyq zertteýlerdiń mańyzyn talqylady.
Tusaýkeserde kóptegen oń pikirler men izgi tilekter aıtylyp, qonaqtar mundaı sharalardyń aldaǵy ýaqytta da jalǵasyn tabatynyna senim bildirdi.
«Shyǵys Qazaqstannyń ańyz-ápsanalary» jınaǵy kitaphana qoryn baıytyp qana qoımaı, oblysymyzdyń mádenı murasyn saqtaý men nasıhattaýǵa qosylǵan mańyzdy úleske aınalady.
