Foto: Ashyq derekkóz
Aımaǵambetovtyń pikirinshe, búgingi tańda balalardyń teledıdardan góri ınternet pen YouTube-ty kóbirek tańdaıtyny úlken másele bolyp otyr. Sondaı-aq, ol balalardyń «Sınıı traktor» men «Masha ı Medved» sııaqty mýltfılmdermen shektelmeı, sapaly ári qyzyqty qazaqsha mýltfılmderdi kórýi tıis ekenin atap ótti.
«Osy maqsatta, kelesi jyldyń bıýdjet jobasyn qarastyrý barysynda, qazaq tilindegi mýltfılmder jasaýǵa 350 mıllıon teńge bóletin jáne olardyń tek teledıdarǵa emes, mindetti túrde ınternetke, sonyń ishinde YouTube-qa júktelýin qamtamasyz etetin normany zańǵa engizdik. Bul balalardyń qazaq tilinde qyzyqty kontentke qol jetkizý múmkindigin keńeıtedi dep senemiz», dep jazdy Ashat Aımaǵambetov Telegram parashasynda.
Sondaı-aq, Aımaǵambetov álemdik hıt mýltfılmderdi de memlekettik tilge aýdaryp, YouTube-qa júkteýdiń mańyzdy ekenin tilge tıek etti. Biraq bul úshin avtorlyq quqyq ıelerimen aýqymdy jumys qajet. Ázirge bul másele tolyq sheshilgen joq, biraq aldaǵy ýaqytta osy baǵytta jumysty jalǵastyrýdy josparlap otyrǵandyǵyn atap ótti.
