Osyǵan oraı uıymdastyrylǵan saltanatty is-shara barysynda aýdan ákimi Azızhan Ismaılov qarymdy qalamgerdiń qazaq ádebıetine qosqan úlesi týraly baıandady. Qalaýbek Tursynqulov atyndaǵy mektepten aldaǵy ýaqytta elimizdi jańa deńgeıge kóteretin bilimdi de ultjandy urpaq tárbıelenip shyǵatynyna senim bildirdi. Sonymen qatar Jazýshylar odaǵy keńesiniń múshesi, aqyn-jazýshy Slamhat Seıithamzauly, aýdandyq ardagerler keńesiniń tóraǵasy Amanbaı Omarov, Sharbulaq aýyldyq okrýginiń tóbe bıi Amantaı Quttymbetov quttyqtaý sóz sóılep, Qazyǵurttyń týmasy Qalaýbek Tursynqulovtyń ómir jolynan áńgime órbitti. Jazýshynyń shyǵarmashylyq erekshelikterimen qatar «Qurmet belgisi» ordenimen, «Eńbektegi erligi úshin» medalimen marapattalǵany, Saha Respýblıkasynyń eńbek sińirgen qaıratkeri, Saha Respýblıkasy Memlekettik syılyǵy men Erlık Erıstın atyndaǵy ádebı syılyǵynyń, Qazaqstan Jazýshylar odaǵy S.Seıfýllın atyndaǵy syılyǵynyń laýreaty ekeni aıtyldy. Saltanatty rásimnen soń kópshilik qaýym ataýly mektepte ashylǵan Qalaýbek Tursynqulovtyń mýzeıi men synybyn aralap, shyǵarmashylyǵynan birqatar tyń derekpen tanysty.
Sondaı-aq Qalaýbek Tursynqulovtyń 90 jyldyǵy aıasynda aýdandyq Mádenıet saraıynda «Qazyǵurt bereke, birlik bastaýy» atty respýblıkalyq aqyndar aıtysy ótti. Jyr saıysyna elimizdiń qala jáne oblystarynan kelgen ot aýyzdy, oraq tildi 10 aqyn qatysty. Qoǵam ómirin, ózekti máselelerdi, aıtýly jetistikterdi jyr joldarymen órbitip, kópshilikke oı salýmen áserli kesh syılaǵan respýblıkalyq aıtystyń qorytyndysynda qazylar alqasynyń sheshimimen Qaraǵandy oblysynan kelgen Maqsat Ahanov bas júldeni ıelense, júldeli I orynǵa túrkistandyq aqyn Bekarys Shoıbekov laıyq dep tanyldy. Al II oryndy Almaty oblysynyń aqyny Aıym Ámirhanova, III oryndy Astana qalasynan Iran-ǵaıyp Aıqynbaıuly, Qyzylorda oblysynan Nurmat Abdýllauly jáne Almaty qalasynan Nurzat Talǵatqyzy enshiledi. Túrkistan oblysynan Nurlybek Meıirmanov, Nurmahan Áripjanuly, Shymkent qalasynan Meıirjan Jarylqap pen Qazyǵurt aýdanynyń aqyny Erasyl Jaqsybek arnaıy júldelerdi qanjyǵalaryna baılady.
Túrkistan oblysy
