Bul jóninde Qazaqstan Respýblıkasy Ulttyq ulany «Batys» óńirlik qolbasshylyǵynyń baspasóz qyzmeti habarlady. Tegin bilim alýǵa múmkindik beretin granttar jaýyngerlik qyzmet jáne jaýyngerlik daıarlyq barysynda erekshe kózge túsken sarbazdarǵa berilgen.
Otan aldyndaǵy boryshyn atqarý barysynda úzdik dep tanylǵan ulandyqtarǵa Qorǵanys mınıstrliginiń atynan bólingen sertıfıkattary áskerı bólim alańynda saltanatty túrde tabys etildi. Grant ıegeri atanǵan sarbazdyń biri – qatardaǵy jaýynger Marǵulan Orazbekov.
– Men Ulttyq ulan qatarynda azamattyq paryzymdy atqaryp júrmin. Jastaıymnan armandaǵan joǵarǵy oqý ornyna «Srochnık.2» baǵdarlamasy arqasynda túsýge múmkindik alyp otyrmyn. Bolashaǵyma jol ashqan, Otan qorǵaýshy retinde qalyptasýǵa kómektesip, tájirıbesimen bólisken komandırlerime erekshe alǵys aıtamyn, – deıdi bolashaq stýdent Marǵulan Orazbekov.
Ol elimizdegi eń bedeldi oqý ordasynyń biri – Ál-Farabı atyndaǵy Qazaq ulttyq ýnıversıtetine oqýǵa túsýdi josparlap otyr. Aıta keteıik, mundaı grantqa qol jetkizgen sarbazdar endi elimizdegi tańdaýly oqý oryndaryna ulttyq biryńǵaı testileýden ótpeı-aq túse alady.
– Áskerı bólimde, bólinisterde vzvod jáne rota komandırleri jaýyngerlik daıarlyq esebin turaqty júrgizip otyrady. Ol esepte sarbazdyń sabaq úlgerimi, belgilengen normatıvterdi oryndaý nátıjesi, jeke basynyń tártibi eskeriledi. Osylardyń nátıjesinde aı saıyn barlyq oqý páni boıynsha reıtıng shyǵarylyp, barlyq derek elektrondyq platformaǵa jazylady, – dedi bólim komandıriniń orynbasary maıor Dáýren Rahımbekov.
Batys Qazaqstan oblysy
