Tárbıelik máni mol is-sharanyń maqsaty – halqymyzdyń salt-dástúrin, ádet-ǵurpyn zamanǵa saı jańǵyrtyp, ony jastar arasyna nasıhattap, otbasy ınstıtýtynyń mártebesin kóterý.
«Qara shańyraq» qoǵamdyq birlestiginiń basshysy Turar Shákenniń aıtýynsha, bul is-shara bıyl ekinshi márte ótip otyr.
«Elimizde otbasylarǵa arnalǵan túrli baıqaý bar ekenin bilemiz. Biraq jas otbasylar arasynda etnografııalyq baǵyttaǵy baıqaý óte az. Bir jaǵynan, qazir urpaq tárbıesi qatty alańdatady. Osy salaǵa qatysty ózekti máseleler de kóp. Ony sheshýge de bolady. Sonyń bir joly – ulttyq qundylyqtardy jastardyń sanasyna sińirý. Búgingi is-sharanyń maqsaty da osy», dedi ol.
Úsh kezeńnen turǵan saıysqa 15-ke jýyq jas otbasynan ótinim túsip, baıqaý shartyna sáıkes 8 otbasy iriktelip alyndy.
Taǵylymdy is-shara barysynda jas otbasylar qazaqtyń baı salt-dástúrin dáriptep, qolóner buıymdarymyzdy nasıhattap, umyt bolǵan ulttyq taǵamdarymyz — úlpershek, órmetós, qarynbúrme, mıpalaý, balqýyrdaq, ásipti daıyndaý tásilin kórsetip, kópshilik yqylasyna bólendi.
Otbasylyq saıysqa aqyn, qoǵam qaıratkeri Ákim Ysqaq, Prezıdent ortalyǵynyń jetekshi ǵylymı qyzmetkeri Aqbota Hamıt, «Qara shańyraq» QB basshysy Turar Sháken, «Qazaq analary – dástúrge jol» respýblıkalyq qoǵamdyq birlestiginiń tóraǵasy, aktrısa Aınur Júginis, aıtysker aqyn Azamat Maljanbaı qazylyq etti.
Sonymen tartysty ótken saıystyń bas júldesin Mekebaı otbasy jeńip alsa, birinshi oryn Muqajan otbasyna buıyrdy. Ekinshi oryndy Sembek otbasy alsa, úshinshi oryndy Saýhan men Hyzaıhan otbasy ıelendi. Al arnaıy atalym boıynsha «О́negeli otbasy» – Qalıt otbasyna, «Dástúrge berik otbasy» – Pirimqul otbasyna jáne «Kórermen kózaıymy» – Muqan otbasyna tabystaldy.
