Shymkentte kásipkerlerge qandaı jaǵdaı jasalǵan?

Basqarma tóraǵasyna megapolıste iske asyrylyp jatqan ınvestısııalyq jobalar jaıynda baıandaldy. R.Batalov árbir ınvestor, kásipkermen tyǵyz baılanysta jumys istep, barynsha qoldaý kórsetý mańyzdy ekenin atap ótti.

«Aldaǵy ýaqytta jergilikti ákimdiktermen birge úılestirý jumysyn pysyqtaý qajet. Túrli memlekettik baǵdarlamalar bar, qarjylaı qoldaýlar da jetkilikti. Munyń bárin jańadan kásip bastaǵan nemese shaǵyn kásipkerler tolyq bile bermeýi múmkin. Sondyqtan bızneske qarjylaı, konsýltatıvtik, quqyqtyq qol­daý kórsetilýi qajet. Sonda ekonomıkadaǵy «kóleń­keli» bıznes azaıyp, bıýdjettiń salyq túsimi artady. Qandaı problema týyndamasyn «Atameken» pala­tasy kómek berýge ázir ekenin bıznes ókilderine uǵyndyrýymyz qajet», dedi ol.

«Atameken» UKP basqarma tóraǵasy óńirlik palata ujymymen de júzdesti. Kásipkerler uıymynyń dırektory Sabıra Adambekova R.Batalovqa atqarylyp jatqan jumystar týraly aıtty. Sóz arasynda Qaırat Moldaseıitov bastaǵan óńirlik keńes óte belsendi jumys atqaryp jatqanyn atap ótti.

«Kásipkerler palatasy birshama mańyzdy máseleni sheshti. Sonyń qatarynda bólshek salyq mólsherlemesin eki ese, ıaǵnı 4%-dan 2%-ǵa tómendettik, odan bólek, Shymkenttegi mal sharýashylyǵymen aınalysatyn kásipkerlerge sýbsıdııa bólý, «Jaıly mektep» jobasy aıasynda offteık kelisimsharttardy túzý boıynsha máselelerdi rettedik. Jergilikti atqarýshy organdar, prokýratýra, sybaılas jemqorlyqqa qarsy is-qımyl, ekonomıkalyq tergep-tekserý departamentterimen tyǵyz baılanysta jumys júrgizilip, ózara áriptestik memorandýmdar túzilgen», dedi S.Adambekova.

Palata basshysy «Atameken» UKP tarapynan sońǵy ýaqytta júzege asyrylǵan iri jobalardyń biri – Investısııalyq kartanyń jasalǵanyn málimdedi. Atalǵan kartaǵa 59 joba engizilgen. Olardyń jalpy quny 465 mlrd teńgeden asady. Bıznes jobalardy súıemeldeý «Invest Shymkent» pen «Qazaqınvest» uıymy tarapynan «Bir tereze» qaǵıdaty negizinde atqarylyp jatyr.

Bıyl 9 aıda óńirlik kásipkerler palatasyna bız­nestiń zańdy múddesi men quqyǵyn qorǵaý jóninde 85 aryz-shaǵym kelip túsken. Nátıjesinde, 120 mln teńge kólemindegi somada kásipkerler quqyǵy qorǵaldy. Palata «Azamattarǵa arnalǵan úkimet» korporasııa­symen birge 2023 jyly Kásipkerlerge arnalǵan kóp­fýnksıonaldy qyzmet kórsetý ortalyǵyn ashqan. Osy jyldyń 9 aıynda atalǵan ortalyq 8 200-ge jýyq qyzmet túrin kórsetti. Onyń ishinde bıznes-jospar qurý, jobalardy súıemeldeý sekildi kómekter bar. Osy jumystardyń arqasynda kásipkerlik sýbektileri grant, nesıe túrinde 377 mln teńgege qol jetkizdi.

Sapar barysynda «Atameken» UKP basqarma tóraǵasy Shymkenttegi iri óndiris oryndarynyń biri – «QazAlPack» zaýytyna baryp, óndiris ornynyń jumysymen tanysty. Atalǵan ká­siporyn sýsyndarǵa arnalǵan alıýmınıı bankalar men qaqpaqtar shyǵa­rady.

ShYMKENT